DAVAO DEL NORTE -- 26 ka mga pamilya ang malipayong midawat sa tag-lima ka kilong bugas nga hinatag gikan sa opisina sa Municipal Environment and Natural Resources (MENRO) sa lungsod sa New Corella.
Matud pa nga ang maong tag-lima ka kilong bugas bugti sa gidala nga mga uga ug hinlong plastik nga botelya didto sa opisina sa MENRO.
Sanglit, subay sa patakaran sa lungsod ubos sa programang "May Bigas sa Basura" nga bayloan sa opisina sa MENRO og tag-lima ka kilong bugas ang 88 ka mga plastik nga botelya nga dad-on didto sa ilang opisina.
Gibutyag nga ang maong 26 ka mga pamilya nakatigom og tag-88 ka mga plastik nga botelya nga ilang gihinloan ug gipauga dayong gidala sa opisina sa MENRO hinungdan nga sila nakabitbit og tag-lima ka kilo nga bugas.
Ang maong programa pinasikad sa Republic Act 9003 o mas nailang Ecological Solid Waste Management Act of 2001 nga maoy hinungdan nga ang mga residente sa lungsod madasigon sa paghipos ug paglain sa mga basura dungan sa pagpangolekta sa mga plastik nga mga botelya nga ang uban gikan pa sa basurahan.