NAGBANGUTAN ang pamilya sa babayeng mabdos ug kaslunon human madisgrasya patay sa motorsiklo alas 7:15 sa gabii, Septyembre 12, sa Tacurong City.
Giila ang namatay nga si Kris Liane Jean Corpuz Maligmat, 23, duha ka bulan nga mabdos ug nagpuyo sa Purok 11, Valdez Subdivision, Barangay Poblacion sa syudad.
Naangol sab ang kauban ni Maligmat nga si alyas Em-em nga drayber sa motorsiklo.
Matud ni MJ, ang live-in partner sa namatay nga si Maligmat nga bag-o lang silang duha niuli sa balay. Apan nananghid ang biktima nga dunay adtoan uban ni Em-em sakay sa Mio nga motorsiklo.
Nakabalita na lamang si MJ nga nabangga ang gisakyan nga motorsiklo sa iyang pamahunon sa kasugat nga kotse sa national highway sa Tacurong City.
Pulos nadala sa balay tambalanan ang mga biktima apan namatay si Maligmat.
Gikompirma ni MJ nga duha ka bulan nga mabdos si Maligmat ug plano na unta nilang magpakasal sunod tuig.
Samtang padayong gisubay pa sa kapulisan sa Tacurong City Police Station ang hitabo.