Barrita: Lagda sa face mask gilugakan

Barrita: Lagda sa face mask gilugakan

Makaginhawa na’g lawom ang mga tawo nga nagsigi’g sul-ob og face mask sukad sa pagsugod sa Covid-19 pandemic bisan sa mga lugar nga hawan ug gawas sa balay ug mga building. Niadtong Lunes, miluwat si Presidente Ferdinand Marcos Jr. sa Executive Order (EO) o Orden Ehekutibo Numero 3 nga nagpalugak sa mando sa pag-sul-ob sa face mask.

Gihimo nang optional ang pagsul-ob og face mask sa gawas sa mga building ug sa mga lugar nga maayo ang bentilasyon ug way mga tawo nga nagpunsisok. Ang maong mando subay sa rekomendasyon sa miaging semana sa Inter-Agency Task Force for the Management of Emerging Infectious Diseases (IATF).

Kon atong mahinumdoman, dakong supak ang IATF sa pagpalugak sa lagda sa pagsul-ob og face mask ni Cebu Gov. Gwendolyn Garcia. Padayong supak ang pundok sa mga doctor ug mga eksperto sa panglawas tungod kay ubos pa ang booster vaccination coverage sa Pilipinas samtang nagpadayon pa ang community transmission sa Covid-19.

Hinuon, ipadayon ang pagsul-ob sa face mask sa sud sa mga pribado ug pangpublikong mga estalisimento, sa mga lugar nga daghan ang mga tawo ug di maayo ang bentilasyon ug sa tanang mga pangpublikong transportasyon.

Gidasig usab kadtong mga tawo nga wa pa makahingpit sa bakuna batok sa Covid-19, mga senior citizen ug kadtong immunocompromised kun dunay gihambin nga balatian sa pagpadayon sa pagsul-ob og face mask ug pagpadayon sa physical distancing sa tanang higayon.

Sa maong EO, ang Presidente miingon nga ang atong mga silingang kanasuran sa Southeast Asia ug ang ubang mga kagamhanan sa kalibotan mipalugak na sa ilang lagda sa pagsul-ob og face mask apan way nakita nga pagsulbong sa mga kaso sa Covid-19 sa ilang dapit.

Matod pa sa pangulo nga hangtod sa Septiyembre 6, miabot na sa 72 ka milyon ka mga Pilipino nga tugbang sa 93 porsyento sa target population, nabakunahan na sa hingpit. Samtang 18 ka milyon o 23 porsyento sa target nakadawat na sa ilang booster shot.

Wall of immunity

Sumala pa ni Press Secretary Trixie Cruz Angeles, hapit na makab-ot sa Pilipinas ang gitawag nga “wall of immunity” batok sa Covid-19 maong gipalugakan ang lagda sa pagsul-ob og face mask. Makab-ot ang wall of immunity kon hingpit nga mabakunahan ang dugang sayes porsyento sa target ug mahimong 100 porsyento na ang hingpit nga mabakunahan sa target population.

Nag-una ang Sugbo sa pagpalugak sa lagda sa pagsul-ob og face mask. Gipakita sa pagluwat sa EO nga sakto ang hukom sa atong local nga kagamhanan. Apan tingali angay sab nga dasigon ang mga tawo nga wa pa kabakunahi nga pagpabakuna na.

Ang mga local nga kagamhanan maoy gitahasan sa pagpatuman sa EO kay sila maoy mag-ila sa mga lugar nga di na kinahanglan ang pagsul-ob sa face mask. Wa pa kita masayod sa benepisyo sa pagpalugak sa lagda sa pagsul-ob og face mask. Apan maklaro na kinsay pislat o taas og ilong.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph