Maayo ra sab nga nakaaamgo ang kadagkoan sa Department of Health (DOH) sa mensahe kabahin sa “optional” nga paggamit sa face mask sa mga lugar nga naa sa gawas ug wala magdasok ang mga tawo ug maoy usa sa mga hinungdan nga gimando na karon nga maoy sundon sa tibuok nasod.
Migula nga ilang gisunod ang baroganan sa Sugbo mahitungod sa paggamit sa face mask.
Maayo ra sab.
Panahon na nga usbon ang atong pagsabot sa Covid ug ang pagdawat sa kamatuoran nga anaa lang gyod sa katawhan ang pag-amping sa ilang kaugalingon inubanan sa suporta sa kagamhanan.
* * *
Buyno, nindot sab nga pakusgan pa ang kampanya sa vaccination, apil na niini ang booster shots.
Nakita nato nga maayo gyod ang resulta kon ang kadaghanan sa katawhan miagi na sa vaccination ug booster shots tungod kay mikunhod ang gidaghanon sa nasakit sa Covid.
Kadtong wala pa makasulay sa vaccination, angay nga ilang huna-hunaon og maayo ang kaanindot kon magpa-vaccine na gyod sila tungod kay mosamot kadaghan ang gidaghanon sa na-vaccine na ug gipaabot nga mosamot nga mokunhod pa ang gidaghanon sa masakit sa Covid.
* * *
Makalingaw ang gibuhat sa usa ka mayor.
Napildi ang iyang gilabanan nga gobernador sa usa ka makabungog nga kapildihan.
Makabungog kay layo kaayo og biya unya dako pa gyod kaayo ang nagasto nga gikopras lang sa mga botante.
Aron tingali makita ang iyang kamaayong tawo, wa gyod niya tangtanga ang hulagway sa kanhi gobernador sa iyang opisina.
Kon adtuon ang iyang opisina, makita ang hulagway ni BBM, tupad ang hulagway sa kanhi gobernador.
Kadtong wala makasabot, matingala ug maglibog. Maglibog sila kon kinsa ang gobernadora nga giila sa maong mayor.
Kon giila pa niya ang kanhi gobernador, nagpasabot nga wala siya moila sa kasamtangan nga gobernador.
Kon mao man kini, ngano man kaha nga moapil man siya sa mga meeting nga gipatawag sa kasamtangan nga gobernador, mopapirma ug mangayo og mga ayuda gikan sa kasamtangan nga gobernador?
Ngano man kaha nga dili siya adto sa iyang giilang gobernador mangayo sa iyang gusto pangayuon?
OA (over acting) ra pod nang tawhana, matod pa sa iyang mga kauban.
Ang uban sab miingon nga gihimo na niya aron pansinon sa kasamtangang gobernador ug pangulitawhan aron moapil sa grupo.
Unsay gilatid nga batakan mahitungod niini? Mahimo ba nga ang usa ka mayor dili motahod ug dili moila sa gobernador?