ANG nawalang sundang ang nasutang hinungdan nga napatay ang mag-asawang senior citizen didto sa Purok 2, Barangay Napungas, Asuncion, Davao del Norte.
Kini ang miguwa sa imbestigasyon sa Asuncion Municipal Police Station kinsa nag-ila sa mga biktima nga mao ang mag-asawang Herminigildo Chaves Barbosa, 65-anyos, mag-uuma, ug asawa nga si Antonia Crisostomo Barbosa, 66-anyos.
Gikabutyag nga nahitabo ang krimen alas 5:30 sa hapon niadtong Septyembre 9, 2022, dihang ang mag-asawa miadto sa balay sa suspek nga ginganlan og Jojo Luardo alyas Dodong, 27 anyos, nagpuyo sab sa samang dapit.
Matud pa nga gikompronta sa mag-asawa ang suspek kabahin sa sundang nga nawala, apan giingon nga nasuko ang suspek ug miinit ang ulo hangtod miabot sa punto nga mikuha kini og sundang ug gipangtigbas ang mag-asawa.
Sumala pa nga samdan sa liog ang mag-asawa, ingon man sa uban pang parte sa lawas nga misangko sa hinanaling kamatayon sa duruha.
Samtang ang suspek human sa gihimong krimen daling mikagiw palayo paingon sa wala masayring direksyon.
Ang patay nga lawas sa mga biktima gipahiluna sa Escriba Funeral Parlor samtang ang kapulisan sa lungsod nagpahigayon og hot-pursuit operation sa tinguha nga madakpan ang mikagiw nga suspek.