Balor og P8,116,276 nga illegal nga drugas nasakmit sa Police Regional Office (PRO) 7 atol sa usa ka adlaw nga Simultaneous Anti-Criminality and Law Enforcement Operation (Sacleo) gikan sa Martes, Septiyembre 13, alas 12:01 sa kaadlawon hangtod sa Miyerkules, Septiyembre 13, sa kaadlawon sa susamang oras sa Central Visayas.
Gipahibawo ni Police Brigadier General Roque Eduardo Vega, hepe sa PRO 7, nga nakasikop sila og 164 ka drug personalities.
Nakadakop usab og 20 ka most wanted persons ug 203 ka wanted persons nga nag-atubang og nagkalainlaing kaso human nalutsan og warrants of arrest gikan sa korte.
Samtang sa kampanya batok sa loose firearms,nakaimbargo sila og 177 ka mga armas nga dili lisensyado ug 17 niini ang gisikop tungod sa paghupot og armas nga walay papeles nga magmatuod nga lisensyado kini.
Matod ni Vega nga magpadayon ang ilang subsob nga kampanya batok sa kriminalidad sanglit nagkaduol na ang holiday season ug maseguro ang seguridad sa publiko.
“I congratulate everyone for a job well done. It is important to plan and let everyone get involved in the operation. Good planning will guide our actions and generate good results,” matod ni Vega.
Ang dakbayan sa Sugbo dunay labing daghang illegal nga drugas nga nasakmit diin kapin sa tunga sa kilo sa gituohang shabu ang ilang naimbargo nga mobalor og P3,646,568.
Matod ni Police Lieutenant Colonel Wilbert Parilla, deputy city director for administration sa Cebu City Police Office (CCPO), daghan pa gihapon ang supply sa illegal nga drugas sa dakbayan bisan sa ilang subsob nga kampanya nga gipatuman.
Sa operations batok sa illegal gambling, nakadakop sila og 238 ka mga tawo nga naatlan nga nanugal diin nasakmit usab nila ang dul-an sa P26,000 nga kwarta sa sugal.
Ang nangulo sa kampanya mao ang kapulisan sa probinsya sa Sugbo human sila nakadakop og 69 ka mga sugarol ug ushers sa illegal swertres.
Matod ni Police Lt. Col. Mark Gifter Sucalit, deputy provincial director for operations sa Cebu Police Provincial Office (CCPO), nga ilang gihingusgan ang kampanya batok sa illegal nga sugal.