Mga namuyo sa aseras ang gipangkarga sa sakyanan sa Kagamhanan sa Dakbayan sa Sugbo aron papaulion sa ilang tagsa-tagsa ka dapit sa lalawigan atol sa clearing operations kagahapon, Septiyembre 14, 2022.
Si Police Lieutenant Colonel Wilbert Parilla, deputy city director for administration sa Cebu City Police Office (CCPO), nagkanayon nga ang clearing operations kabahin sa ilang pagpangandam sa Pasko ug kampanya batok sa kriminalidad.
Ilang gikonsiderar ang maong mga tawo nga namuyo sa aseras nga hulga sa seguridad.
Matod ni Parilla, nahitabo na kini sa usa ka 16 anyos nga tinun-an nga gitulis ug gidunggab-patay sa Barangay Bulacao sa miaging buwan.
Dunay gitahasan ang Cebu City Hall nga mohawan sa mga sidewalk apan ang problema mobalik lang usab sila.
Ang gihimo karon sa kapulisan ug sa LGU matag gabii na nila ilusad ang clearing operations aron masiguro nga dili na mamalik ang mga nangatulog.
Gawas niini, ipadayon nila ang rescue operations sa mga menor de edad sa siyudad nga naa lang sa karsada bisan sa lawom na nga kagabhion.
Giangkon ni Parilla nga kadtong mga 14 anyos paubos nga makahimo og krimen dili sila makiha apan mamahimo sila nga ibutang sa pasilidad aron ipaubos sa rehabilitasyon.
Ang kapulisan sa dakbayan nakadakop og usa ka 14 anyos nga lalaki nga sakop sa notadong Akyat Bahay gang sa Punta Princesa.
Apan dili kini mapasakaan og kaso tungod sa pangidaron busa gidala kini sa Department of Social Welfare and Services (DSWS) alang sa rehabilitation program.