Kapulisan sa kalungsoran ug unom ka mga siyudad sa lalawigan sa Sugbo gimandoan nga ipagawas ang 90 porsiyento sa ilang personnel alang sa beat patrol ug gibanhaw usab nila ang tactical motor riding unit sa matag police station sa Probinsya.
Matod ni Police Lieutenant Colonel Mark Gifter Sucalit, deputy provincial director for operations sa Cebu Police Provincial Office (CPPO), kabahin kini sa kamandoan ni Police Brigadier General Roque Eduardo Vega, hepe sa Police Regional Office (PRO) 7, ngadto sa bag-ong CPPO officer-in-charge, Police Colonel Rommel Echave, aron mapugngan ang krimen ning nagkaduol na usab ang pagsaulog sa Pasko.
Ang 10 porsiyento nga magpabilin sa mga police station ang mohimo sa office works samtang ang uban kanila mohimo sa anti criminality program.
Gilauman nga makita na ang mga pulis nga naka uniporme sa nagkadaiyang eskina sa kalungsuran nga mag silbing beat patrol aron mapugngan ang mga krimen sama sa kawat, tulis ug uban pa.
Niawhag si Sucalit sa publiko sa matag lungsod nga kon wala silay makita nga pulis sa kadalanan mahimo sila nga motawag sa police station o ba kaha sa provincial command aron mahatagan nila kini og pagtagad ug madisiplina ang mga personnel nga wala motuman niini.
“We are hoping also the feedback of the community nga if wala silay nakita, do not hesitate to inform our office also para ma correct pud. Kinahanglan nga two- way ang feedback ba,” matod ni Sucalit.
Gitinguha sa bag-ong OIC sa kapulisan sa probinsya nga magpabilin nga luwas ang mga Sugboanon gikan sa mga criminal nga mangigo sa mga tawo.
Gipahibawo usab ni Sucalit nga ibalik nila ang tactical motor riding unit sa matag municipal police station ug sa unom ka mga siyudad nga maoy motubag sa alarma labi na sa bukirang dapit nga dili na masulod sa dagkong mga sakyanan.
Kadtong mga lungsod nga walay motorsiklo mamahimo nga makig-alayon ang hepe niini sa local nga kagamhanan aron maabagan sila nga makaangkon og motor nga makatabang sa ilang pagpatrolya.
Gipasigarbo hinuon ni Sucalit nga ubos ang crime volume sa tibuok Probinsya sa Sugbo karon itandi sa nanglabay nga mga buwan diin ang nag-una nga krimen mao ang tulis ug kawat.