Nakadawat og pasidungog ang jail sa lungsod sa Consolacion isip Best Municipal Jail of the Year sa regional level sa Lunes, Septiyembre 12, 2022.
Nidawat sa award mao sila si Jail Chief Inspector Mark Anthony Omega, jail warden sa lungsod, gikan ni Bureau of Jail Management and Penology chief, Jail Director Allan S. Iral uban nila ni BJMP 7 Regional Director Jail Chief Superintendent Efren A. Nemeño, Assistant Regional Director for Administration Jail Senior Superintendent Renante B. Rubio, Assistant Regional Director for Operations Jail Superintendent Nanding Bayle, ug Regional Chief of the Directorial Staff Jail Superintendent Rosalina P. Malahay.
Ang lungsod nominado usab sa national level. Ikaduha na kining tuig nga ilang naangkon ang maong pasidungog. Ang paghatag sa maong pasidungog kabahin sa ika 31 nga tuig sa pagkahimugso sa BJMP.
Nakadawat usab ang lokal nga kagamhanan sa Consolacion pinaagi ni Mayor Teresa “Nene” Alegado og special award gikan sa BJMP tungod sa walay puas nga suporta sa lungsod ngadto sa maong ahensiya.
Matud ni JCI Omega nga ang hinungdan nga ilang nakuha ang maong pasidungog tungod sa relihiyuso nga pagpatuman sa mga programa ug tumong sa BJMP.
Sama sa tukma sa panahon nga pagpagawas sa kwalipikado nga Persons Deprived of Liberty (PDL) aron malikayan ang sobra nga pagpabilin sa PDL sa prisohan ingon man ang pagproseso sa good conduct time allowance.
Ug ang dali nga pagsumite sa tanan nga mga report ug uban pang gikinahanglan.
Si Alegado nalipay sa maong kalamboan.
Gibutyag sa mayor nga kanunay ang lungsod nga nagsuporta sa mga programa sa mga nasudnong mga ahensiya sama sa BJMP, Philippine National Police (PNP) ug Bureau of Fire Protection (BFP).
Gani ang lungsod midonar na og yuta nga adunay gidak-on nga 3,000 metro kwadrado sa Barangay Panas aron dili na maghuot ang mga PDL gumikan kay gitinguha man usab ni Mayor Alegado nga hamugaway kini.
Nihangyo na si Alegado ngadto kang Dept. of the Interior and Local Government Secretary Benhur Abalos nga magahinan og budget alang sa maong pasalidad ug gidasonan ni Iral nga aduna nay P100 milyunes nga maimplementar sa sunod tuig.
Nigahin usab kini og pundo alang sa dugang pagkaon sa mga PDL ug mga tambal ug pagpahigayon og medical mission sa maong pasilidad. (gikan sa PR)