Si Presidente Ferdinand “Bongbong” Marcos Jr. nipirma niadtong Martes, Septiyembre 13, 2022, sa executive order alang sa usa ka tuig nga moratorium sa tinuig nga amortization ug pagbayad sa interes sa agrarian reform beneficiaries (ARBs).

Ang Department of Agrarian Reform (DAR) niingon nga ang pagpagawas sa kamanduan maoy katumanan ni Marcos sa usa sa iyang mga saad atol sa iyang unang State of the Nation Address (Sona).

Tumong niini nga matabangan ang mga benepisyaryo sa ARBs gikan sa ilang mga utang, aron magamit nila ang kuwarta sa pagpalambo sa ilang mga umahan, pagpadako sa ilang kapasidad sa pagpalambo ug pagduso sa pagtubo sa ekonomiya.

Si DAR Secretary Conrado Estrella III niingon nga ang maong kamandoan usa usab ka pagpangandam alang sa laing katumanan sa pasalig ni Marcos, nga mao ang pagpalabang sa Kongreso og balaod nga mokonsentir sa mga pautang sa ARB nga adunay wala mabayri nga amortization ug interest.

Atol sa iyang Sona, si Marcos niingon nga ang condonation sa kasamtangan nga agrarian reform loan mosakup sa kantidad nga P58.125 bilyon, nga makabenepisyo sa dul-an sa 654,000 ka ARBs ug naglambigit sa kinatibuk-ang 1.18 milyones ka ektarya sa mga yuta nga gihatag.

“We always think about the farmers’ welfare. The one-year moratorium and condonation of farmers’ loan payment will lead to freedom of farmers from debts,” matod niya.

Ubos sa Section 26 sa Republic Act 6657, o ang “Act Instituting a Comprehensive Agrarian Reform Program to Promote Social Justice and Industrialization, Providing the Mechanism for its Implementation, and for Other Purposes,” ang mga ARB nga gihatagan og mga yuta gikinahanglang mobayad ngadto sa Land Bank of the Philippines sa 30 ka tinuig nga amortization sa 6 porsyento nga interes kada tuig.(TPM sa SunStar Philippines)