Daghang dumadapig ni Presidente Ferdinand “Bongbong” Marcos nga gianggaan og PBBM ang nag-obserbar sa iyang pamaagi sa pagdala sa renda sa pangagamhanan sa Pilipinas.
Adunay nakauyon samtang anaay nagduda nga luag ra kaayo ang iyang pagtratar sa mga abusado sa gobiyerno. Samtang si kanhi Presidente Rodrigo Duterte way pugongpugong kon masuko. Si PBBM kalma lang gihapon, murag dili maantigong manuyo.
Daghan nang anomaliya nga nahitabo sa iyang administrasyon sama sa pagsuway unta og pagpalit og asukar nga 300,000 metric tons nga sumala sa Senate Blue Ribbon Committee ang mga sakop sa Sugar Regulatory Board lang ang naghukom nga ilang gipatuo nga maoy kasugoan ni PBBM. Diha usay pipila ka mga peke nga appointments nga gipatuo nga gikan sa Malacanang.
Giimbestigar na hinuon kini. Daghang mga negosyante nga nasakpang nanago sa stock sa asukar nga nabunggo sa Bureau of Customs (BOC) apan wala gyud kita makadungog nga mitaas ang tingog sa Presidente sa kasuko.
Adunay mga grupo nga nagpaluyo kang PBBM apan kontra ni Executive Secretary Vic Rodriquez. Sukad niadtong pagtudlo sa usa ka suod ni ES Rodriquez kang Christopher “Chet” Pastrana isip general manager-designate sa Philippine Ports Authority (PPA) buot na nilang ipatangtang si Rodriquez.
Adunay gipalakaw nga mga tabi nga adunay usa ka religious group nga mireklamo batok sa executive secretary kay nangayo kunog minilyon aron matudlo sa pwesto ang usa sa ilang mga sakop.
Gipasanginlan usab siyang maoy utok sa Sugar Order No. 4. Ako nagtuo nga dili matangtang sa pwesto kini si Rodriquez kon dili grabe na gyud kaayo ang iyang kasal-anan nga maduhig na si PBBM kay mao kini ang iyang personal nga abogado nga mao usab ang diha sa iyang kiliran sa dihang naninguha pa si Marcos nga mahimong kandidato sa pagka-presidente.
Siya usab ang giilang campaign manager ni PBBM mao nga gitudlo siya sa iyang pwesto karon ug mao usab ang nangulo sa mohashas sa mga tawo nga ilang irekomendar ngadto sa Presidente aron kini matudlo og pwesto. Bisan ang mga trolls ni Marcos nabahin na sa uyon ug supak kang Rodriquez.
Ang mga dumadapig ni Bise Presidente Sara Duterte, sumala sa mga Marites, nagbantay usab sa mga tawo nga gipanudlo ni PBBM sa pwesto.
Sumala pa nga buot nila nga kinahanglan dili dominahon sa mga dumadapig ni PBBM ang mga appointment nga kalimtan na lang ang mga loyalist sa Bise Presidente.
Gikahadlokan nga ang relasyon ni PBBM ug VP Sara mag-agad sa mga tawo nga ipanudlo sa dagkung pwesto sa gobiyerno.
Dili hinuon kini sama sa sili nga mohalang dayon apan molanat pa kuno kini og kapin sa tuig.
Usa sa pagduda sa mga dumadapig ni Inday Sara nga tingalig dili siya maoy pagdaganon sa pagka-presidente sa sunod presidential election kay ilang gikahadlokan nga tingalig matintal si Senador Imee Marcos nga mopuli sa iyang igsuon. (mannyrabacal1144@gmail.com)