Sea bus wala pa makabalik sa kakuwang sa dunggoan

Ngano nahunong ang labing una nga sea jeepney o sea bus nga unang nilawig niadtong Oktubre 28, 2019?

Si Nelson Mejia Jr, Ph.D., chief executive officer (CEO) sa MCE Shipping Lines, nagkanayon wala na sila mopadayon gumikan sa limitado nga tawo gumikan sa pandemic sa Covid-19.

Apan iyang gipadayag nga labing dako nga rason kon nganong hangtod karon wala pa sila nakabalik sa operasyon taliwa sa pag-normalize na sa patigayon diin abli na ang tanang establisemento ug daghan nang tawo gumikan sa kakuwang sa mga imprastraktura sa local government units.

“The problems are the ports for berthing within south are not yet ready,” padayag ni Mejia.

Iyang gipadayag nga base sa ilang inisyal nga panag-estorya, pabor sa maong proyekto si Mayor Gerald Anthony “Samsam” Gullas sa Talisay City apan ang ubang local chief executives sama sa Minglanilla, City of Naga, San Fernando ug Carcar City wala pa nakahatag sa ilang commitment dihang ila kining gipahibawo sa proyekto.

Matod pa ni Mejia nga andam mo-deploy og upat ngadto sa unom ka mga barko ang MCE Shipping Lines.

Ang ilang shipyard nga maoy naghimo sa barko gi-build ug gi-design sa GAM Engineering Services nga nahimutang sa Barangay Punta, San Remegio, Cebu nga akreditado sa Maritime Industry Authority (MARINA).

Si Mejia nagkanayon nga ang ilang unang katuyoan mao ang pagtabang aron moluag ang nagkahuot nga trapiko sa karsada pinaagi sa pagbalhin sa ubang pasahero gikan sa karsada paingon sa dagat sakay sa ilang “seabus”.

“Ang atoang business model is purpose driven, not pocket driven,” padayag sa CEO sa MCE Shipping Lines.

“What I proposed to the LGU is prepare their city and municipalities nga naa nagkupot along the coastline, dapat naa silay access for the sea or docking area. Mao ni ang mga challenges nga dili nato ma-resolve unless the government itself will do something about it,” dugang ni Mejia.

Iyang gipadayag nga bisan makakuha lang sila og 2,000 ngadto sa 3,000 ka mga pasahero matag adlaw, dako na kini og ikatabang para moluag ang Cebu South Bus Terminal diin magpundok ang mga pasahero.

Gamit ang seabus sa biyahe sa Cebu City gikan sa Pier 1 paingon sa City of Naga anaa lang sa 30 minutos ug Carcar City sa 45 minutos.