Sapa nga nagdugtong sa mga barangay sa Day-as, Parian ug T. Padilla sa dakbayan sa Sugbo nga hinungdan sa pagbaha panahon sa pagbunok sa ulan gilimpyohan sa mga sakop sa Police Regional Office (PRO) 7 diin toneladang basura ang ilang nakuha.
Nagtinabangay ang kapulisan, mga opisyal sa tulo ka mga barangay, uban sa mga sakop sa Bureau of Fire Protection (BFP) ug Department of Public Works and Highways (DPWH) aron limpyohan ang sapa nga nahimutang sa dalan Sikatuna ug Bonifacio.
Gitawag kini sa PRO 7 nga project HAW-AS kun Hiposon, Alsahon, Wagtangon, Ang Sagbot sa mga Estero ug Kanal nga maoy nakaingon sa baha.
Ang maong sapa maoy hinungdan sa dugay na nga problema sa paglunop sa tubig sa mga lumolupyo kon mobunok ang kusog nga uwan sanglit mosulod kini sa kabalayan ug mga building nga nahimutang sa maong lugar.
Matod ni Police Lieutenant Colonel Mary Crystal Peralta, tigpamaba ni Police Brigadier General Roque Eduardo Vega sa PRO 7, nga tonelada nga mga plastic nga basura ang ilang nakuha nga usa sa nakahuot sa agianan sa tubig hinungdan nga mosuyla kon mokusog ang uwan.
Dako nga problema ang ilang nakita, sigun ni Peralta, sanglit mabaw na lang kaayo ang sapa nga kinahanglan na nga kawton sa backhoe aron dili na mosuyla ang tubig baha kon mobunok ang uwan.
Lakip sa ilang nabantayan mao ang kahugaw na sa tubig sanglit ang hugaw gikan sa pansayan sa kabalayan nga naay namuyo sa kilid didto na modiretso sa sapa nga angay hatagan og pagtagad sa City Health ug Kagamhanan sa Dakbayan sa Sugbo.
“Isa sa mga problema na nakita natin dito ay ang kanilang mismong estero, na witness natin na ang estero nila yung kanilang deposito dapat nasa septic tank pero nakita natin na nakalabas sa ating kanal o estero,” matod ni Peralta.
Una nang niluwat og pamahayag si Cebu City Mayor Michael Rama nga makab-ot lang ang ilang gitinguha nga Singapore like nga siyudad pinaagi sa disiplina sulod sa pamilya.
Kon wa nay molabay og basura sa sapa ug sa bisan asa aron malikayan ang problema sa baha, dili layo nga makab-ot ang maong damgo sa siyudad.
Tungod niini, nisaad ang kapulisan sa Central Visayas nga motabang sa Kagamhanan sa Dakbayan sa Sugbo pinaagi sa pagkuha sa mga basura sa estero nga dugay na nga nihuot hinungdan nga dili na makalahos ang tubig paingon sa dagat.