Di gub-on diha-diha ang mga building nga nakalapas sa three-meter easement sa kasapaan sa dakbayan sa Sugbo.
Gitataw ni retired General Roy Cimatu, consultant ni Mayor Michael Rama kabahin sa environment ug chairman sa Task Force Gubat Baha sa usa ka press conference sa Huwebes, Septiyembre 15, nga ipatawag sa Dept. of Environment and Natural Resources (DENR) ang mga tag-iya sa mga estruktura.
Sa panagtagbo tukion ang ilang kalapasan sa buhatan ug kon mahimo nila, sila ra ang moguba sa ilang estruktura busa di na kinahanglanon pa ang notisya sa demolisyon gikan sa Siyudad.
Kini maoy pag-ila sa kagamhanan sa katungod sa tag-iya sa pagpanag-iya sa propyedad.
Matod ni Cimatu nga ang illegal settlers di usab diha-diha panghinginlan tungod kay kinahanglan silang andaman og mga mabakwitan.
Si manlalaban Gerardo “Gerry” Carillo, pangu sa City Disaster Risk Reduction and Management Council, niingon nga ila pang i-survey ang kasapaan aron pagdeterminar sa kalapdon.
Ilang determinahon pinaagi niini kon asa magsugod ang three-meter easement gikan sa daplin sa sapa.
Basehan sa Siyudad ang survey sa 1912 pagdeterminar sa orihinal nga gilapdon sa sapa.
DREDGING
Si Cimatu niingon nga base sa iyang nakita sa pagbisita sa kasapaan sa kinapusoran sa siyudad, gikinahanglan ang massive dredging aron kini mapalapdan.
Matod niya nga kinahanglan nga paladman ang mga sapa aron maminusan ang mga pagbaha ug madali ang pag-agas sa tubig.
Pinaagi niini, di na maabtan og usa ka oras ang paghubas sa tubig nga kasagaran maoy kadugayon sa pagkakaron.
Sa samang higayon, matod ni Cimatu nga magmalampuson lang sila kon dunay kooperasyon sa mga barangay kapitan sama niadtong taas pa ang mga kaso sa coronavirus disease 2019 (Covid-19).
Si Cimatu niingon nga ang mga barangay mao nay mobantay sa mga sapa aron wa nay molabay pa og mga basura.
Matod niya nga ang tinguha sa task force kaayuhan alang sa tanan busa angay nga dunay kooperasyon.
“Our mandate is for the benefit of the future generation,” matod ni Cimatu.