Gideklarar sa Kagamhanan sa Probinsya sa Sugbo ang all-out war batok sa illegal nga drugas sa lalawigan atol sa gipahigayon nga Provincial Development Council meeting sa Kapitolyo kagahapon, Septiyembre 15, 2022.
Ang maong tigum gipangulohan ni Cebu Governor Gwendolyn “Gwen” Garcia kauban ang mga sakop sa Provincial Peace and Order Council (PPOC), Provincial Anti-Drug Abuse Council (Padac) ug Provincial Disaster Risk Reduction and Management Council (PDRRMC).
Nalakip sa gihisgutan ang pagpanalipod sa kaluwasan ug kahapsay sa kalungsoran sa probinsya sa Sugbo.
Sa maong higayon, gideklarar ni Garcia nga hingusgan ug hiniusang batokan ang mga kalihukan sa mga ilegalista.
“I would wish to make a statement now in the presence of all of our chief executives and other officials. In the presence of officials from the national government and agencies that here right now, Cebu declares a total all-out war against drugs,” matod ni Garcia.
Matod ni Garcia nga ang hiniusang pagsanong sa mga stakeholder ug kadagkoan sa kalungsoran ug siyudad sa probinsya maoy mahimong sukaranan sa paglaom niini sa luwas ug hapsay nga palibot.
“Klarong istorya kon dili nato padayunon ang total all-out war against drugs, there will be no peace and order to talk about..” matod ni Garcia.
Subay niini, giawhag sa gobernador ang tanang local chief executives ug ahensya sa gobyerno nga hingusgan ang pakigbatok sa illegal nga drugas.
“The province of Cebu hereby declares total all-out war against drugs in all of its component cities and municipalities,” dugang niya.
Ang programa pakigbatok sa illegal nga drugas gisugdan sa milabay nga administrasyon nga gipatuman lukop nasud. Nalakip sa mga programa niini ang pag-evaluate og maayo sa mga barangay aron mamahimong ilhon nga drug cleared kun ang mga drug addict na-rehabilitate ingon man ang subsob nga anti-illegal drug operations.
Base sa datos sa Philippine Drug Enforcement Agency (PDEA) sukad sa 2016 hangtod sa Disyembre 2021, mokabat sa P74.3 bilyunes ang nasakmit nga illegal drugs sa nasod.
Atol sa usa ka adlaw nga Simultaneous Anti-Criminality and Law Enforcement Operation (Sacleo) gikan sa Martes, Septiyembre 13, alas 12:01 sa kaadlawon hangtod sa Miyerkules,
Septiyembre 14, gipahibawo sa Police Regional Office (PRO 7), nga nakasikop sila og 164 ka drug personalities sa Sugbo.
Ang dakbayan sa Sugbo maoy dunay labing daghang illegal nga drugas nga nasakmit diin kapin sa tunga sa kilo sa gituohang shabu nga mobalor og P3,646,568.
Samtang sa probinsya sa Sugbo moabot usab sa 208.73 gramos sa gidudahang shabu nga mobalor og P1,419,364.(ANV, BB)