Usa ka 11 anyos nga batang lalaki nga mamarukay sa gidiling drugas ang naluwas ug 28 anyos nga sinaligan sa criminal gang nasikop atol sa pagronda sa hiniusang pwersa sa kapulisan sa Sityo Tarcom, Barangay Busay, dakbayan sa Sugbo, pasado alas 4:00 sa kaadlawon kagahapon, Septiyembre 15, 2022.
Ang Criminal Investigation Detection Group (CIDG) Cebu Field Unit (CFU) ug Operation Detection Section (ODS) uban sa Cebu Force Mobile Company (CFMC) ug Regional Intelligence Unit (RIU)-7 mao ang nagsilbi sa warrant of arrest batok sa managsuong Arnel ug RJ Abella.
Sumala sa kapulisan, ang Abella criminal gang naglihok sa dakbayan sa Sugbo ug kasikbit nga mga silingang siyudad apan ang duha pulos dunay mga kaso nga murder, homicide, ug illegal nga paghugot og armas, nagpuyo sa nahisgutang lugar nakaikyas sa pag-abot sa mga awtoridad sa lugar.
Ang menor de edad ug 28 anyos nga lalaki mao ang naabtan sa kapulisan.
MAMARUKAY
Gikataho nga ang bata maoy suguon sa ilegal nga transaksiyon sa grupo nga mohatod apil na usab ang mamarok sa dapit.
Dugang nasayran sa kapulisan, ang bata kaupat na naluwas sa awtoridad sa ronda sa ilegal nga kalihokan ug ikaduha sa walo ka mga managsuon. Ang amahan naa sud sa bilanggoan tungod sa kaso sa drugas.
Matod pa, ang 11 anyos nakadaog og P65 sa pinustahay sa duwa sa basketball ug niabot sa balay sa managsuong Abella aron pagpalit ug pagsuyop sa gidiling drugas.
Ang bata nga nasikop gi-turnover sa barangay nga gitugyan sa iyang ginikanan ug Department of Social Welfare and Development (DSWD).
SINALIGAN
Samtang, si William “Junjun” Banono, 28, sinaligan sa gang, nasakpan sa kapulisan sulod sa laing balay nga silingan sa pinuy-anan sa managsuong Abella.
Si Banono nasita sa grupo ni Police Lieutenant Joseph Elmer Cornea samtang ang ubang operatiba nangita kang Arnel kon asa nidagan.
Girekisa si Banono apil ang sling bag nga iyang dala ug nahibaloan nga dunay armas sa sulod ug usa ka kalibre .45 nga armas nga dunay walo ka mga bala ang naimbargo sa pulis.
Si Banono nakuhaan usab og mga shabu sa iyang bulsa nga upat ka putos.
Si Police Lieutenant Colonel Hector Amancia, hepe sa CIDG Cebu Field Unit, nibutyag nga si Banono maoy sinaligan sa managsuong Abella.
Nasayran nga kining managsuon taudtaod na nilang gipangita apan wa madakpi kay igmat nga makasibat.
Gawas sa gidiling drugas, nalambigit usab isip gun-for-hire, matod ni Cornea.
Ang konsehal sa Busay nga si Renato Caballes nga nahinabi sa Superbalita Cebu nibutyag nga ang managsuong Abella nga taga Sityo Tarcom maoy nagsuplay og gidiling drugas sa dapit.
Nikompirmar si Caballes nga si Banono ang sinaligan sa managsuong Abella.
Ang nadakpan mag-atubang og kaso nga kalapasan sa paghupot og armas lakip na ang paghupot og ilegal nga drugas. /