NANAWAGAN si Presidente Ferdinand Marcos, Jr. ngadto sa mga miyembro sa Bangsamoro parliament nga magtinabangay alang sa pagkab-ot sa kalinaw ug kalamboan sa Bangsamoro Autonomous Region in Muslim Mindanao (BARMM) nga gipangulohan sa mga Moro.

Si Presidente Marcos maoy pinasidunggang bisita sa inaugural session sa 2025 Bangsamoro parliament, kansang 80 ka miyembro iyang gitudlo niadtong Agosto human natapos ang ilang trabaho sa 2019 hangtud 2022 ubos ni Presidente Rodrigo Duterte.

Ang parlamento sa Bangsamoro nailhan usab nga Bangsamoro Transition Authority (BTA), kansang 80 ka miyembro, kauban si Chief Minister Ahod Murad Ebrahim, hiniusang nagdumala sa operasyon sa regional autonomous nga gobyerno.

Si Ebrahim maoy tsirman sa Moro Islamic Liberation Front (MILF).

Nitambong sa maong kalihukan si Nur Misuari, founding chairman sa Moro National Liberation Front (MNLF).

Adunay mga miyembro sa MNLF sa parliament nga ang majority bloc naglangkob sa 41 ka mga representante gikan sa MILF.

Giawhag ni Marcos ang mga miyembro sa BTA sa pagpasa sa balaod sa buhis, pagpadali sa pagpahigayon sa eleksiyon sa 2025 ug tutukan ang pag-atiman sa panglawas ug komunikasyon.

Gipasalig sab ni Marcos nga hugot ang suporta sa nasudnong kagamhanan sa BARMM.

Miabot si Marcos sa kapitolyo sa BARMM sa Cotabato City pinaagi sa Awang Airport sa Datu Odin Sinsuat, Maguindanao Province, duol sa headquarters sa 6th Infantry Division, Philippine Army, mga walo ka kilometro ang gilay-on.

Ang Presidente gikuyogan nila Senate President Juan Miguel Zubiri, House Speaker Martin Romualdez, Interior and Local Government Secretary Benhur Abalos, Special Assistant to the President Antonio Ernesto Lagdameo Jr. ug Supreme Court Associate Justice Japar Dimaampao.