Gitaktak ang kuponan sa basketball sa Barangay Candulawan sa Talisay City Mayor’s Cup basketball tournament Under-16 division human nadiskubrehan nga aduna kini anomaliya nga gihimo.
Ang opisina sa Talisay City Sports Commission (TCSC) nipahibawo nga nakadawat sila og daghang reklamo kalabot sa usa ka magduduwa sa Candulawan nga dili lumolupyo sa dakbayan sa Talisay.
Ang maong magduduwa, kansang hulagway na-post sa social media, usa sa mga sinaligan sa Candulawan.
Sa gihimong imbestigasyon sa TCSC, nasuta nga ang gitumbok nga magduduwa dili maoy nakarehistro nga pangalan nga nahilakip sa orihinal nga lineup sa team.
The player who played in the Mayor’s Cup games U16 division is a different person from the one in the original lineup,” pamahayag sa TCSC.
Ang desisyon nga pagtaktak sa Candulawan nakabase sa lagda sa kompetisyon.
“A team who allows non-residents or players who are not in the official line-up to participate in the games shall cause disqualification for the entire tournament and all their games shall be awarded to the opposing team,” dugang sa TCSC.
Si Jeaneth Villagonzalo, pangulo sa TCSC, niingon nga ang gitumbok nga magduduwa sa Candulawan usa ka residente sa laing dakbayan sa Sugbo.
Matod ni Villagonzalo nga nagsilbe kining leksyon alang sa uban pang partisipanteng teams.
Si Candulawan Barangay Captain Josefina Concial niingon nga ilahang irespeto ang desisyon sa TCSC.