Gipasidan-an sa dakong opisyal sa Cebu South ug North Bus Terminal ang tanang mga konduktor nga dili maligo, nanimaho ang ilok ug dili magsul-ob og tarong nga sapot nga dili na sila pasudlon sa terminal.

Kini maoy gipahibawo ni Carmen Quijano, pangu sa CSBT ug CNBT nga iya sa Probinsya sa Sugbo, sa interbyu sa Superbalita Cebu sa Septiyembre 16, 2022.

Matod ni Quijano nga subay sa iyang nabantayan sagad sa mga konduktor manimaho ug dili magsul-ob og tarong samtang mamasahero.

“Daghan man gud og complaints ana nga hugaw, baho. Mao na nga makita nako, ako dayon pahibaw-on, ipatawag nako,”matod ni Quijano.

Ang paghinlo sa kaugalingon usa sa gisubli nga sulti ni Quijano sa mga pangu sa mga bus ug mini buses nga mobiyahe gikan sa terminal paingon na sa kalungsoran sa probinsya sa Sugbo.

Dugang sa pangu nga lakip sa iyang i-ban mao ang mga konduktor nga wala’y tupi, magsul-ob og sleeveless ug magpurol lamang samtang namasahero.

“Kanang naay driver ug konduktor baho kaayo’g ilok naay time nga diri kaduha ko anhia. Giingnan ko nga unsa man nang konduktor nimo, Ma’am, nga baho man og ilok...Naay mga mini buses in and out kanang mga driver ug konduktor usahay sugaton kay kon ako’y makasakop, bahalag wa kay konduktor paguwaon gyud nako, ang driver maoy pasudlon nako,”matod ni Quijano.

Iyang gipasabot nga di kinahanglan nga mahalon ang sul-ubon apan mas maayo kon limpyo ug presentable nga moatubang sa mga pasahero ilabi na sa mga turista nga gustong mosakay sa mga bus ug mosuroy sa mga tourist destination sa probinsya.

“Wa man ta mag-ingon nga nindot gyud ang sanina pero at least ba presentable ba, dili nga magsul-ob ta anang gisi-gisi, unya tag-as kaayo’g buhok, tag-as kaayo’g bungot mao na nanuyo ko ba,”matod ni Quijano.

“Ako gyud ning gipahingusgan labi na sa North Bus Terminal nga dili gyud i-allow kanang maghubo, kanang mag sleeveless lang bitaw. Di sad gyud maayo kanang mga driver ug konduktor mga tag-as kaayog buhok...Kana sa North Bus maglisod pa man ta og announce maong ipatawag gyud nako,”dugang niya.

Gawas sa mga konduktor, gipahimangnoan usab ni Quijano ang mga driver nga magsul-ob sa insakto sama sa sapatos.

Ang pagsul-ob og sapatos agi og pagsanong sa Memorandum Circular 2011-004 nga giluwatan sa Land Transportation Franchising and Regulatory Board (LTFRB) nga nag require sa mga driver sa mga Public Utility Vehicle (PUV) sa pagsul-ob og sapatos.

Kon makalapas, posibleng makamulta og P2,000 sa unang offense ngadto sa P5,000 ug franchise cancellation sa ikatulong offense.

Sulod sa terminal, ipatawag niya ang drivers ug konduktor ug pahimangnoan.

Kon ugaling dili mopatuo ang konduktor, dili na kini pasudlon sa terminal.