Kapulisan sa dakbayan sa Sugbo nabalaka sa pagbalik sa away sa mga gang sa mga publikong tunghaan human nasuta nga duna na usay laing tinun-an ang gisuwayan sa pagkulata sa laing mga tinun-an.
Ning higayuna, kini nahitabo sa Regino Mercado National High School sa Huwebes sa gabii, Septiyembre 15, 2022 sa Brgy. Pahina Central, dakbayan sa Sugbo.
Ang duha ka mga gang mao ang Crips ug Bloods.
Sa imbestigasyon sa Carbon Police Station nasuta nga ang maong mga tinun-an sakop sa gang nga wala pa matino kon asa kanila ang Crips ug Bloods, apan giingong napakgang kini sa gwardya sa tunghaan.
Nailhan ang maong mga estudyante nga gitakdang ipatawag sa guidance counselor ug principal aron ipaubos sa imbestigasyon.
Samtang migawas usab sa imbestigasyon sa Mabolo Police Station nga miyembro sa Crips gang ang tinun-an sa Mabolo National High School nga gidunggab sa laing tinun-an.
Ang suspek nasuta usab nga sakop sa karibal nga Bloods gang.
Matod ni Police Lieutenant Colonel Wilbert Parilla, deputy director for administration sa Cebu City Police Office, nga sa wala pa ang pagpanunggab, duna nay bangi ang duha ka mga grupo.
“It was confirmed by our chief of police nga mibalik na sad ning grupo sa Bloods ug Crips. Base sa ilang investigation, ilang nahibaw-an nga ang kadtong biktima miyembro sa Crips nya ang suspect Bloods,” matod ni Parilla.
Gumikan niini, nabalaka na ang kapulisan sanglit ilang nabantayan nga mibalik na usab ang problema sa mga gang human nibalik ang face-to-face classes.
Tungod sa maong mga insidente, gimandoan ni Parilla ang 11 ka police stations nga makig-alayon sa mga publikong tunghaan nga sakop sa ilang hurisdiksyon aron mahatagan og dinalian nga pagtagad.
Ilhon usab nila kinsa kining mga tinun-an nga mo-recruit sa kauban niining estudyante aron pasudlon sa gang aron ilang mapatawag uban sa kadagkoan sa tunghaan.
Dako ang posibilidad nga kining nahitabo kabahin sa initiation sa duha ka mga grupo nga angay mapakgang sa kadagkoan sa tunghaan ug kapulisan.
Nipasalig si Parilla nga mo deploy sila og mga personnel sa gawas sa eskwelahan ilabi na panahon sa gabii nga buhian na ang mga bata sanglit naa sa maong oras mahitabo ang krimen.
Kinahanglan nga ang mga bata makapauli na sa ilang tagsa-tagsa ka balay sa dili pa ang alas 10 sa gabii nga maoy oras sa curfew.
Subling giawhag sa kapulisan ang mga ginikanan nga monitoron nila ang ilang mga anak nga nag tungha sa night high school aron masuta kon nisulod ba og gang ug mapahimangnoan nga undangon na. /