Nakakita na ko og social media posts sa bike patrollers nga nanakop og mga malapason sa bike lane ordinance sa Dakbayan sa Sugbo. Apan wa pa ko kabantay nga duna silay gipangbadlong sa mga nag park dapit sa Imus Road, labina sa habig sa Brgy. Lorega San Miguel.
Sa usa ka social media post, dunay ni-react sa akong comment nga naay mga sakyanan nga nag park sa bike lane sa stretch sa mao nga dan. Bisan sa gabii, grabe na kadaghan diha.
Sa ako nang giingon, mahimo ra man nga mag schedule ang Sugbo Bike Lanes Board og mga oras nga exclusive lang sa mga biseklita sa partikular nga mga oras ang bike lanes. Sama sa alas 6-8 sa buntag ug alas 4 hapon hangtod sa alas 8 sa gabii.
Mao ning mga oras nga ting-uli sa kadaghanan sa mga trabahante nga makigpatentero sa mga sakyanan, labina sa mga motorsiklo nga nangaanad na sa pagsulod sa bike lanes.
Ang Dakbayan sa Mandaue way gipili nga oras, basta masakpan ka sa enforcer nga nisubay ka sa bike lane, dakpon ug tiketan ka. Tingali, mas naglisod ang mga awtoridad sa pagpatuman sa balaud, mas maayong dunay pagahimuon nga compromise na lang.
Kinahanglan nga kana nga mga oras ang bike lanes exclusive lang sa mga biker.
TUN-AN
Mahimong di sa tanang mga bike lanes kini ipatuman. Tun-an sa kadagkuan sa board ang mga bike lanes nga agianan sa daghang bikers nga nag bike to work. Segurado ko nga sa Imus Road ngadto sa P. del Rosario lahos na sa N. Bacalso daghan ang nag bike to work. Bisan sa gabii, daghan pang nagbiseklita.
Ang nakapait lang kay daghan sa nagmotorsiklo ang way respeto sa bike lane kay wa pa man sila katilaw nga dunay nidakop nila kay shared lane lagi ni, but alang nako, base sa akong obserbasyon, dako kaayong sayop.
Kinahanglan dunay partikular nga oras nga i-exclusive ang bike lane. Kon kinahanglan amendahan ang ordinansa, mas maayo. Kaayuhan gyud ni sa bikers, labina kadto intawong naggamit og biseklita aron makadaginot sa ilang pletihan matag adlaw.
Kay kabos kaayo mi kaniadto, nga bisan gani ligid lang sa biseklita di mi maka-afford, maluoy kaayo kong magtan-aw niadtong magbiseklita sa trabaho nga yano ra kaayo ang gisakyan. Nagpasabot nga gikinahanglan ang pag bike aron mas daghan ang madala nga pagkaon sa lamesa.
Ingon niana ang pagtan-aw sa mga kabos nga sama nako. But di maka feel niini ang kadaghanan sa public officials nga sagad naa sa middle or upper income group.
MAPATUMAN
Hinaut nga consistent ang pagpatuman sa balaud, bisan asa nga lugar ug si bisan kinsa ang makalapas.
Pinaagi lang sa kanunay nga pagpatuman sa balaud, madisiplina kaming mga motorista. Magbantay na ming di makalapas sa balaud sa trapiko.
Ang kakuwang gud sa pagpatuman ug ang now you see, now you don’t, maoy hinungdan nga lisod disiplinahon ang mga motorista sa kadalanan.