Kon nadayon pa ang pagbalik ni Brooklyn Nets superstar Kevin Durant (KD) sa Golden State Warriors human sa iyang gihangyo nga trade, mahinangpon kining dawaton ni Warriors superstar Stephen Curry (SC).
Atol sa trade saga ni Durant nga wala nadayon, ang tibuok team sa National Basketball Association (NBA) gusto nga makuha ang iyang serbisyo.
Ang superstar point guard sa Warriors nga si Curry nitug-an ngadto kang Matt Sullivan sa Rolling Stone nga ang pultahan sa ilang team dako og abli aron pagdawat sa two-time Finals MVP nga si KD.
Ang Nets ug ang kampo ni Durant nagkasinabot ra sa kaulahian aron magpabilin ang iyang serbisyo sa Brooklyn city ug wala madayon ang trade sa 12-time All-Star.
“There was a conversation internally amongst us about ‘If he was available, would you?’ Every team has those conversations, and obviously in our situation, they’re gonna call me and ask me, ‘How do you feel about it?’ I was never hesitant,” pagpasabot ni Curry. “The idea of playing with KD and knowing who he is as a person, from our history in those three years, I think KD’s a really good dude,” dugang ni Curry.
Si Durant maoy nangulo sa duha ka kampyonato sa Warriors niadtong 2017 ngadto sa 2019 ug iyang nadala ang Warriors sa tulo ka sunodsunod nga Finals appearances.
Pag-expire sa iyang kontrata, siya nipirma og tulo ka tuig nga kontrata sa Nets ug niining bag-o, ang iyang kontrata gilugwayan pa para masiguro nga makuha ang iyang serbisyo.
Taliwa sa superstar status sa Nets sanglit ilang nakuha ang serbisyo ni Kyrie Irving ug James Harden, pakyas gihapon sila pagsulod bisan sa Conference Finals.
Sa miaging season, sila gisilhig sa Boston Celtics gumikan usab sa mga injury nga niigo sa ilang team ug vaccination status ni Irving batok sa Covid-19.
Taliwa sa trade saga ni Durant nga natuldokan na, si Curry suportado gihapon sa iyang kanhi kauban.