Hangtod ning pagsulat, wa pay kalamboan nga giladlad ang delegasyon sa PBA kalabot sa ilang pagbisita sa Japan aron kunohay sa pagpalig-on sa ilang relasyon tali sa mga kadagkoan sa B. League.
Wa man tuod nila iklaro kon unsa gyud ang ilang dakong katuyoan sa maong pagbisita, apan matataw nga kini may kalabutan ning hinayhinay nga pagpanglayas sa dekalibre o mga star players sa lega ngadto sa laing nasod, ilabi na gyud sa Japan.
Gikabalak-an karon nga kon kini magpadayon, mosamot nga langawon ang mga duwa sa PBA ug tingalig moabot ang panahon nga sila-sila na lang unya ang magyampungad nga manan-aw sa mga duwa kay kon wala nay mga star player, mawad-an sab og excitement ang aksiyon.
Wala sila mohikyad kon unsay solusyon nga ilang ikatanyag sa Japan kay sila man gyuy apektado kaayo niini.
Kinsa ba gud nga mga player ang dili mahaylo sa offer sa Japan nga katuloon og pilo ang ilang madawat sa PBA.
Mao ni dakong suliran karon sa PBA kay kon dili ang Japan mosugot kon unsay ilang hangyo, di sab gyud sila ka pugong sa mga player.
Labaw pang dili sila makatupong o makapalabaw sa suweldo sa B. League nga gitanyag ngadto sa mga atleta.
Mao ni nakalisod kay wa silay hold sa sitwasyon kon dili ang pagpakiluoy ra gyud intawon.
Pero taympa una. Di ba, niadtong wala pa ang B. League sa Japan, di ba daan na man nga mikunhod ang mga nagsunod sa PBA?
Usa sa mga rason niini mao kining di balansi ang kompetisyon tungod kay ang mga dagkong kompaniya sama sa San Miguel Corporation (SMC) ug sa MVP Group of Companies yano ra kaayong makakuha og dekalidad nga mga player pinaagi sa trade.
Ning uwahi lang, duna na usay blockbuster trade nga gihimo ang TNT, NLEX ug Blackwater nga nagtangag og dakong pangutana.
Tiaw mo bay ang no.1 pick sa Blackwater sa niaging PBA rookie draft nga si Brandon Ganuelas-Rosser ug ang free agent nga si Paul Desederio ibaylo ngadto sa rising star nga si Calvin Oftana ug bigman Raul Soyud.
Unya ang Blackwater mobaylo sab nila ni Oftana ug Suyod ngadto sa TNT alang nila ni Rosario ug Gab Banal.
Daghang kilay nga miisa niini tungod kay niadtong 2019 dunay polisiya ang PBA nga gihimo nga dili na ma-trade ang no. 1 pick sa drafting sulod sa pipila ka tuig.
Kini tungod niadtong nakontrobersiyal nga trade sa Kia Picanto (karon mao na ang Terrafirma Dyip) sa ilang no. 1 Draft pick ngadto sa San Miguel baylo sa mga edaran na nga sil si Ronald Tubid, Jay-Reyes ug Rashawn McCarthy.
Pero unsang pagka unsaa nga gi-deny na man sab ni ron sa PBA ug nagkanayon nga wala kunoy gilusad nga polisiya kalabot niini.
Ang nakanindot kay recorded ra ba sa mga national sportswriters sa Manila ang pamahayag ni commissioner Willier Marcial nga sugod 2019 dili na madali-dali og trade ang no. 1 pick. Ano ba talaga, Kuya?
Pastilan. Di man gani kasulbad sa problema nga anaa ra mismo nila ang solusyon unsa pa kaha kon toa sa laing grupo nagdepende ang kasulbaran?
Mao ni rason nganog nagkadungan ning hudlat sa PBA nga ilang giatubang karon. (jun.migallen22@gmail.com)