Dam tukuron sa Cebu City; dugang P100M alang sa CCMC

Photo by Mae Fhel Gom-os
Photo by Mae Fhel Gom-os

Gitakdang motukod ang Cebu City Government og Mananga dam sa bukirang Barangay Lusaran, diin nahimutang ang ulohan sa sapa sulod sa wala pay tulo ka tuig.

Mao kini ang gisulti ni manlalaban Jerone Castillo, special assistant sa buhatan ni Cebu City Mayor Michael Rama, sa usa ka press conference sa Waterfront Hotel & Casino Mactan sa Biyernes, Septiyembre 16, 2022, human sila nidunggo gikan sa Manila alang sa “investment begging.”

Si Rama gikatahong nakakuha og pasalig gikan sa business tycoon nga si Enrique Razon Jr. nga pundohan ug tukoron ang dam, atol sa iyang laing hugna sa “investment begging” aron pondohan ang mga proyekto ug programa sa Kagamhanan sa Dakbayan.

Kauban sa mayor mao sila si City Planning and Development Office head Joseph Michael “Yumi” Espina, South Road Properties Management Office head Roberto Varquez, Public Information Office head Cerwin Eviota, ug pipila ka personnel sa Mayor’s Office.

Matod nila nga posibleng makadasig kini og dugang mga negosyo nga moanhi sa Sugbo ug masustiner ang suplay sa tubig sa dakbayan tungod kay kini gipaabot nga mopaubos sa kantidad sa tubig ngadto sa P20 matag metro kubiko.

Si Razon gikatahong niingon nga ang usa ka dam mahimong matukod sulod sa 10 ngadto sa 15 ka tuig apan mahimo nilang mub-an kini ngadto sa duha ngadto sa tulo ka tuig.

Wala pa hinuon makahatag si Rama sa kantidad nga magasto ni Razon, apan nitataw nga mga bilyones kini.

“I am very clear about the city. The only thing I can assure is good governance. Way mangilkil mao na akong gi assure,” matod ni Rama dihang gipangutana kon unsay gipangayo sa mga investor isip sukli sa ilang investment sa dakbayan.

Ang Metropolitan Cebu Water District (MCWD) una nang nipahibalo nga mopatuman sila og 70 porsiyento nga usbaw sa tubig sugod sa Hulyo 2023 ug bahinon kini sa duha ka hugna.

Si manlalaban Jose Daluz III, MCWD chairman sa board of directors, niingon nga adunay adjustment sa water tariff og 60 porsiyento sugod Hulyo 1 sunod tuig ug “supplementary adjustment sa 2024 sa 10 porsiyento.”

Gitataw ni Daluz nga ang MCWD wala pa nagpatuman og bisan unsang price adjustments sulod na sa walo ka tuig, bisan pa nga ang mga water utilities makapatuman niini matag lima ka tuig sumala sa gilatid sa Local Water Utilities Administration guidelines.

Sa giplanong adjustment, si Daluz niingon nga kadtong nagbayad og P183.17 matag buwan sa pagkonsumo og 10 cubic meters nga tubig matag adlaw kinahanglang mobayad og P250.51 matag buwan sugod sa Hulyo 1, 2023.

Nagpasabot kini og usbaw nga P67.34 matag buwan, o P2.24 matag adlaw.

Sa pagkakaron, kasagaran sa mga konsumidor sa MCWD mobayad og P15.20 matag cubic meter sa unang 10 cubic meters sa usa ka buwan.

“Out of 130-plus water districts all over the Philippines, we are in the top 10 as to the cheapest water. Even with this adjustment, we will still be in the top 10 on the cheapest rate,” matod ni Daluz.

Ang MCWD nigasto og P2.1 bilyones alang sa ilang mga programa ug proyekto nga nagtumong sa pagpausbaw sa suplay sa tubig sa Sugbo gikan sa 2015 ngadto sa 2022.

LAING SAAD

Atol sa upat ka adlaw nilang pagpakilimos sa puhonan, nakakuha sab sila og P100 milyones gikan sa Megawide Construction Corporation alang sa paghuman sa pagtukod sa Cebu City Medical Center (CCMC).

Laing kompaniya usab nisaad nga mopundo alang sa usa ka planta sa LNG, nga makahatag og dul-an sa 300 megawatts dili lang sa Siyudad kon dili sa Probinsiya sa Sugbo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph