CCPO: Tawag sa bomb threat sa UP di gama-gama sa pulis

BOMB THREAT? Usa ka sakyanan sa Special Weapons and Tactics (Swat) sa Cebu City Police Office (CCPO) miabot sa University of the Philippines (UP) Cebu campus niadtong Biyernes tungod sa giingong bomb threat, apan negatibo sa ilang pagsusi. / UP CEBU TUG-ANI
BOMB THREAT? Usa ka sakyanan sa Special Weapons and Tactics (Swat) sa Cebu City Police Office (CCPO) miabot sa University of the Philippines (UP) Cebu campus niadtong Biyernes tungod sa giingong bomb threat, apan negatibo sa ilang pagsusi. / UP CEBU TUG-ANI

Di hinimo-himo o tumo-tumo sa kapulisan sa Cebu City Police Office (CCPO) ang alarma sa bomb threat sa University of the Philippines Cebu campus sa Brgy. Kamputhaw, Dakbayan sa Sugbo sa Biyernes sa udto.

Apan ila pang gitino kinsa ang nanawag sa telepuno sa Mabolo Police Station nga dunay bomba sa sulod sa campus.

Giluwatan kini sa CCPO human ang kadagkuan sa UP-Cebu nangayo og progress report sa kapulisan kalabot sa bomb threat.

Ang Mabolo Police Station nakadawat og tawag sa telepono sa nagpaila nga usa ka “Atty. Espina” nga dunay bomba nga gibutang sa sulod sa UP Campus.

Dali nga niresponde ang mga sakop sa Special Weapons and Tactics uban sa Explosive Ordnance Disposal sa kapulisan sa dakbayan apan nasuta nga wala kini kamatuoran ug walay napalgan nga bomba.

Gihimakak usab sa tunghaan nga nanawag sila sa Mabolo Police Station nga nangayo og pakitabang labot sa giingong bomba.

Ang kadagkoan sa UP pinaagi ni Atty. Leo Malagar, chancellor sa UP Cebu, nipadala og suwat sa CCPO nga mangayo sila sa resulta sa imbestigasyon aron mahatagan usab nila kini og pagtagad.

Si Police Lieutenant Colonel Janette Rafter, deputy city director for operations sa CCPO, nagkanayon nga nagpaabot pa sila sa progress report sa Mabolo Police Station kon duna na ba silay gipangdudahan nga responsabli sa prank call.

Hugot nga gibarugan sa kapulisan sa Siyudad sa Sugbo nga nakadawat gyud silag tawag sa telepono nga nagpahibawo nga adunay bomba nga mo buto sa UP Campus ug wala sila mag tumo-tumo labot niini.

Wala silay rason, matod ni Rafter, nga maghimo-himo sila og alarma kon wala sila nakadawat og impormasyon.

“Dili mi gusto nga moresponde og ingon ana kon wala lang ta makadawat og information. Kasi nga it will also create scenario sa atong komunidad, not only UP specifically in other establishment in any other places like what happened before. Kon mahinumdom mo last month man siguro to, daghan kaayo tag nadawat nga mga bomb threat calls, ato sa gyud na i-verify ang tawag. As far as the police response while verifying the veracity of the call, dili pud ta kaingon nga dili ta moresponde, ” matod ni Rafter.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph