Di pa diha-diha masinati sa publiko ang umento sa pletihan sa pampublikong mga sakyanan nga giaprobahan sa Land Transportation Franchising and Regulatory Board (LTFRB).
Gitataw ni LFRTB 7 Regional Director Eduardo Montealto sa text message sa Superbalita Cebu nga ipublikar pa ang giaprobahan nga umento sa pletihan.
Human sa pagpublikar, huwaton una ang 15 ka mga adlaw una pa magsugod ang pagpatuman sa umento.
“Fifteen days after sa publication. Mga October 3 (sugod sa pagpatuman) seguro,” text ni Montealto.
Busa, wa pay mga taripa ang mga sakyanan hangtod nga di pa magsugod ang epekto sa umento.
Matud ni Montealto nga ang pagka-epektibo sa usbaw sa pletihan magdepende sa publikasyon niini sa University of the Philippines(UP), nga maoy ilang repository.
Sa samang higayon giklaro ni Montealto nga permanente na ug dili na provisional ang umento sa plitehan sa public utility vehicles (PUVs), partikular sa P1 nga plitehan sa traditional ug modernized jeepneys.
Si Montealto Jr., nitug-an sa SunStar Cebu nga adunay P2 nga provisional base fare nga naaprobahan niadtong Hunyo ug epektibo niadtong Hulyo ning tuiga.
Matod ni Montealto nga P1 ra ang nahatag nga permanente sa LTFRB.
“Ang provisional anytime pwedeng bawion kon mobaba ang diesel kay mao man nay number one nga factor. So karon dili na mabawi kay kinahanglan na og consultative meeting with the stakeholders,” matod ni Montealto sa Sabado, Septiyembre 17, usa ka adlaw human gibutyag sa LTFRB Central Office ang umento sa plitehan sa mga PUV.
Niadtong Biyernes, Septiyembre 16, giaprobahan sa LTFRB ang ilang giingon nga provisional base fare increase sa mga jeepney, bus, taxi, ug bisan sa Transport Network Vehicle Service (TNVS).
Sa usa ka pamahayag, ang LTFRB nagkanayon nga ang minimum nga plitehan, o sa unang upat ka kilometro sa traditional public utility jeepneys (TPUJ) kay P12 na karon gikan sa kasamtangang P11, nga adunay dugang nga plitehan nga P.30 matag mosunod nga kilometro.
Alang sa modernong PUJs, ang minimum nga pletihan kay P14 gikan sa kasamtangang P13, ug dugang P.40 matag mosunod nga kilometro human molapas sa upat ka kilometro.
“Based on the increase, the fare for succeeding kilometer run for TPUJ will be P1.80 from the current P1.50, while for MPUJ, [it] will be P2.20 from P1.80,” matod sa ahensya.
Ang mga jeepney driver una nang nisang-at og petisyon nga nangayo og P3 nga usbaw sa ilang minimum nga plitehan taliwala sa sunodsunod nga pagsaka sa presyo sa lana dala sa kagubot sa Ukraine.
Alang sa public utility buses (PUBs), giaprobahan sa LTFRB ang P2 uniformed base fare increase sa city ug provincial buses sa unang lima ka kilometro nga adunay dugang pletihan nga P.35 ngadto sa P.50 matag mosunod nga kilometro depende sa klase sa bus.
Ang mga grupo sa bus, sa ilang bahin, nangayo og P4 ngadto sa P7 nga umento sa pletihan.
Giumentuhan usab sa LTFRB 7 ang flag-down rate sa mga taxi gikan sa P40 ngadto sa P45 ug P55 sa TNVS gawas sa hatchback type
“There will be no increase in the succeeding kilometers,” dugang sa ahensya.
Ang LTFRB niingon nga magpabilin ang 20 porsiyento nga diskwento alang sa mga senior citizen, persons with disability ug mga estudyante.
NALIPAY
Si Gregory Perez, tsirman sa Pinagkaisang Samahan ng mga Tsuper at Operator Nationwide (Piston) Cebu Chapter, nitug-an sa SunStar Cebu nga gihangop sa transport group ang maong kalambuan apan gibati ang kabug-at niini sa mga pasahero.
“Usa lang mahitabo ana mao ang dugang nga pas-anon sa atoang mga sumasakay sa taas nga plitehan labi na sa mga trabahante nato nga ang suholan wala pa gyud mosaka og dako, gamay ra kaayo og umento,” matod ni Perez.
Gihatagan og gibug-aton ni Perez nga ang Piston wala magpetisyon alang sa laing usbaw sa plitehan sa mga public utility vehicles (PUVs), partikular na sa tradisyonal ug modernong mga jeepney.
Matod niya napugos ang ubang transport groups sa pagpangayo og usbaw kay gikatahong way lakang ang gobyerno unsaon pagtubag sa nagkataas nga presyo sa gasolina sa nasud ug excise tax.
Bisan pa niini, gipasalig ni Perez sa publiko nga mohatag sila og 20 porsiyento nga diskwento sa mga tinun-an, seniors, ug persons with disabilities (PWDs) sumala sa gilatid sa balaod. (dugang taho ni REV)