Barrita: Umento sa pletihan

Nagkadusingot ang bana nga niuli sa balay. Gipangutana siya sa iyang asawa. Asawa: “Nganong gipaningot man ka, love?” Bana: “Nisaka man gud and pletihan, love.” Asawa: “Ngano man diay og niumento ang pleti?” Bana: “Nigukod na lang ko sa jeep aron makadaginot.” Asawa: “Taxi unta to ang imong gigukod para dako imong madaginot.”

Giaprobahan sa Land Transportation Franchising and Regulatory Board (LTFRB) ang umento sa minimum nga pletihan sa hapit tanang public utility vehicles (PUVs) ug ang flagdown rate sa taxi ug mga transport network vehicle service (TNVS) units.

Si LTFRB Chair Cheloy Garafil niingon nga subay kini sa petisyon nga gipasaka sa transport groups nunot sa pagsaka sa presyo sa mga produkto sa lana sama sa diesel ug gasolina.

* * *

Si Garafil miingon nga ang umento sa pletihan magsugod sa Oktubre 4. Sa traditional jeepneys, ang minimum nga pleti giumentohan gikan sa P11 ngadto sa P12.

Ang mosunod nga matag kilometro giumentohan gikan sa P1.50 ngadto sa P1.80.

Sa modern jeepneys, giumentohan ang minimum nga pleti gikan sa P13 ngadto sa P14. Ang mosunod nga matag kilometro giumentohan gikan sa P1.80 ngadto sa P2.20.

Samtang sa passenger buses, giumentohan og P2 ang minimum nga pleti sa unang lima ka kilometro sa city ug provincial operations.

Ang pleti sa ordinary city buses giumentohan gikan sa P11 ngadto sa P13, samtang ang airconditioned city buses giumentohan gikan sa P13 ngadto sa P15.

Ang matag kilometro sa ordinary buses anaa na sa P2.25 gikan sa P1.85, samtang sa air-conditioned buses, nahimo nang P2.65 gikan sa P2.20.

* * *

Ang flagdown rate sa taxi ug sedan-type nga TNVS vehicles giumentohan gikan sa P40 ngadto sa P45. Apan gipabilin sa P2 ang pleti sa matag kilometro.

Alang sa AUV ug SUV-type nga TNVS vehicles, ang flagdown rate giumentohan gikan sa P50 ngadto sa P55. Samtang sa mga hatchback-type vehicles, gihimong P35 gikan sa P30.

Si Garafil miingon nga magpadayon ang 20 porsyento sa diskwento alang sa senior citizens, persons with disabilities ug sa mga estudyante.

Sa mga hamtong na, ayaw na lang mo kahibung kon pangitaan mog ID sa conductor ug drayber. Wa na sila magtuo nga estudyante mo. Ila lang giklaro kon makaapil na ba mo sa discount sa senior citizens.