Nilarga si Presidente Ferdinand “Bongbong” Marcos Jr. kagahapon, Septiyembre 18, 2022, paingon sa New York aron motambong sa high-level week sa 77th session sa United National General Assembly (UNGA).

Sa pamahayag sa dayong biya sa Ninoy Aquino International Airport, si Marcos nagkanayon nga motambong siya sa daghang bilateral meetings ug business engagements sa iyang pagbiyahe.

Katuyoan niini mao ang paghatag og dakong bili sa tumong sa administrasyong Marcos bahin sa economic recovery, food security, climate change, renewable energy ug agricultural productivity.

Matod sa presidente, mopresentar siya sa giatubang nga krisis sa kalibotan nga opurtunidad sa nasod sa paghimo og makahuluganon nga aksiyon nga alang sa kahiusahan inubanan sa komon nga tumong sa kalinaw, kauswagan ug kalamboan sa nasod.

Dugang niya, ang Pilipinas mopatigbabaw sa iyang pagka komitado sa ideals sa UN, gitumbok ang tampo sa malinawon nga pagsulbad sa kagubot ug bahin sa international law lakip sa pag-ila sa international dialogue ug cooperation.

“The UN is where the countries of the world congregate to discuss the most pressing challenges facing our people, thus, it is important for us to participate in the general assembly and to make certain that our voice is heard,” matod ni Marcos.

Si Marcos gikatakda nga mohatag og pamahayag sa Martes, Septiyembre 20, diin iyang ilatid ang gipaabot sa Pilipinas sa UN ug trabaho sa umaabot, ang papel sa nasod ug tampo sa pagpalig-on sa international system.

Ang tema sa 77th UNGA, “A watershed moment: Transformative solutions to interlocking challenges” nga gitumong sa pagtubag sa wala damha nga panghitabo sa kalibotan sama sa Covid-19 pandemic, climate change ug ang nagkainit nga kasamok.

“I will also participate in business activities to forge more partnerships to advance our national economic and sustainable development in general.

“I will be joined in these meetings by key private sector representatives who have been and will continue to be our partners in this endeavor, more vibrant public-private partnership will allow us to achieve the better normal that we all aspire for,” dugang niya.

Gikatakda si Marcos nga makigkita sa Filipino community didto sa Amerika.

Matod niya, nagpasalamat siya sa suporta nga gihatag kaniya ug iyang giila ang kamahinungdanon sa tahas nga nagpadayon alang sa pagpanday sa nasod ug pagpalig-on sa kooperasyon. (SunStar Philippines)