Opisyal nga giablihan ang pagsaulog sa 30th Cebu Press Freedom Week sa misa sa Cebu Archdiocesan Shrine of St. Pedro Calungsod sa Archbishop Residence compound sa Barangay Zapatera, dakbayan sa Sugbo kagahapon sa alas 11:00 sa buntag, Septiyembre 18, 2022.
Si Fr. Jonathan Rubin sa San Pedro Calungsod Shrine maoy nidumala sa misa uban ni Fr. Roberto Ebisa, SVD, station manager sa DYRF 1215 Radyo Fuerza Cebu ug Power FM 89.1 sa Word Broadcasting Corp. ug presidente sa Kapisanan ng mga Brodkaster ng Pilipinas (KBP) Cebu chapter.
Sa wali ni Fr. Rubin, nitumbok siya sa duha ka mga butang sa pagsaulog sa press freedom: pagkamapasalamaton sa mga tawo nga nakigbisog niadto ug dili mawad-an sa paglaum sa umaabot uban sa pagpamalandong sa dayag nga reyalidad sa kasamtangang sitwasyon.
“Logically, there is no such thing as Press Freedom Week if there were no individuals, whose rights were violated and whose freedom was constricted,” matod ni Rubin.
Gipahinumdoman niya ang mga magtutuo, labina sa media, nga dili kalimtan ang gipakigbisogan nga kagawasan panahon sa usa ka semana nga kasaulogan.
Si Rubin nilabay og pangutrana “kon unsay atong pagsabot sa freedom?”, dason niya, taliwala sa pagtumaw sa social media nga nahimong nataran ug sayon nga espasyo alang sa kagawasnon nga pagpadayag.
“We all have witnessed and gone attest how this present media of communication have been used and sadly abused,” dugang ni Rubin, gigamit sa pagpasa sa bakak nga taho ug naghatod sa miscommunication inay sa paghatag og bug-at nga kamatuoran nga giya sa kahiusahan.
“Freedom is never about being, having, doing, saying, posting, sharing whatever we personally want,” pasabot ni Rubin, nga ang kagawasan kinahanglan masabtan ug magserbisyo sa uban o komunidad.
Dugang pa, si Rubin nga ang kagawasan mapadayag ug nagsilbi sa personal nga kawsa, kalamboan ug interes dili kagawasan apan pagkahakog.
Labaw sa tanan, ang kagawasan nagpasabot nga nagbuhat sa mithi sa Ginuo ug sa kahiusahan sa tanan uban Kaniya nga atong magbubuhat.
Samtang, si Cherry Ann Lim, editor-in-chief sa SunStar Cebu nga lead convenor sa kasaulogan ning tuiga, nagkanayon nga hybrid ang kasaulohan apan daghang linawas o pisikal nga kalihokna human sa duha ka tuig nga hugot ang restrictions sa coronavirus disease (Covid-19) pandemic.
Matod ni Lim, makahuluganon sa media ang kasaulogan nga magkompetensiya sa pagbugtaw og balita apan nagkahiusa ning panahona.
Dugang niya nga makahuluganon usab tungod sa ika-50 o golden anniversary sa pagdeklarar sa Martial Law karong Septiyembre 21, 2022.
Gipasabot niya nga ang pagpahigayon sa press week diin nasulod ang kasumaran sa deklarasyon sa martial law nagpahinumdom sa katawhan sa dayag nga kalapasan panahon sa balaod militar.
“And that we should always be vigilant so that this will not be repeated, so everyone has to remember what happened, then so that we don’t repeat the mistakes of the past,” matod ni Lim.
Samtang si Fr. Ebisa, isip kabahin sa media sa Sugbo, nagpasalamat sa panaghiusa sa lokal nga media ug nanghinaut nga dugang kalig-on sa kasaulogan.