Ang matag tawo, kon adunay gihuptan nga pwesto sa gobyerno, ilabi na kon gipili sa katawhan, natural nga adunay panglantaw alang sa dapit nga iyang silbihan. Importante kini ilabi na niadtong nagtinguha nga magbilin og nindot nga agi sa katawhan nga iyang giserbisyuhan.
Si Mayor Michael Rama adunay panglantaw nga ang dakbayan sa Sugbo himuon niyang “Singapore-like city”.
Kining plano ni Mayor Rama naglakip sa pagbayad sa utang sa Dakbayan, matinuod na ang BRT project, ug sulbaron ang problema sa trapiko, polusyon lakip ang baha ug uban pa.
Daw sa gisungog ang mayor kay sa pipila ka mga semana ang nakalabay pwerteng grabeha sa baha nga nasinati sa mga lumolupyo sa dakbayan.
Ang mga apektado wa mahimuot, hinuon nanaway sa tinguha sa mayor ug ang uban nagbugalbugal pa kaniya.
Atol sa pakipulong ni Mayor Rama atol sa paglusad sa programang Gubat sa Baha ug ika-siyam nga citywide cleanup drive niadtong Septiyembre 17, 2022, iyang gipabuhagay ang iyang gibati pinaagi sa pag-ingon nga “leave Cebu City. I will repeat. Leave Cebu City. We don’t want you here.”
Gitumong kini niya niadtong mga nanaway ug nangita og sayop sa iyang administrasyon ilabi na sa yang tinguha nga mahimong sama sa Singapore ang dakbayan sa Sugbo.
Di angay nga mapikon ang mayor ning mga tawhana, hinuon dawaton kini niya isip usa ka hagit.
Maayo tingali nga ipalapos niya sa iyang pikas dunggan kining mga panahom sa mga nangita og sayop sa iyang mga lihok unya mopadayon siya sa iyang mga tinguha.
Di man kalikayan nga adunay mga kritiko kay anaa man kita sa demokrasya, apan mas maayo nga kon unsa may plano ni Mayor Mike, sugdan na niya sa paghimo nga pwede ra nga magpakahilom una siya unya ang mismong kalampusan niya maoy iyang isagpa ngadto sa mga nanaway kaniya.
Nindot nga panig-ingnan nga ang tinguha sa mayor alang sa mosunod nga mga henerasyon kay kitang mga buhi karon maningkamot ta nga ang atong natagamtaman karon nga mga maayo mao usab ang ilang matagamtaman sa ilaha na unya nga panahon o labaw pa niini.
Kon molampos si Mayor Mike ning iyang panglantaw, laing monumento na usab sa laing Rama ang mosubol nga mamahimong idolo sa umaabot nga mga henerasyon. (josephelvirtubilan@gmail.com)