Patay ang anchorman sa radyo human dunggaba sa usa ka mag-uuma sa Barangay Himucdungon, lungsod sa Mabinay, Negros Oriental, alas 6:00 gabii sa Dominggo, Septiyembre 18, 2022.
Ang biktima giila nga si Renato Blanco, hingkod, taga dalan Talavera, Barangay 2, dakbayan sa Bais, Negros Oriental nga magsisibya sa 102.1 DYRY FM sa Mabinay.
Matod ni Police Brigadier General Roque Eduardo Vega, director sa Police Regional Office (PRO) 7, ang biktima mibisita sa iyang higala nga si Wilbert Amada sa maong barangay.
Apan kalit lang nga niabot ang suspek nga si Charles Yanoc Amada, 48, mag-uuma nga igsuon ni Amada ug walay daghang istorya, gidunggab kini sa tuong abaga.
Dali nga gidala ang biktima sa Mabinay Community Hospital apan gideklarar kini ni Dr. Rochelle Kristine T. Bokingkito nga dead on arrival (DOA).
Nitahan hinuon dayon ang suspek kang Josephine Amada, barangay kapitan sa Himucdungon, dala ang ang napulo ka pulgada nga kutsilyo nga maoy gigamit sa pagluba niini.
Sa imbestigasyon sa kapulisan, nasuta nga nasuko ang suspek tungod sa pag-ataki sa biktima sa iyang pamilya sa programa niini sa radyo.
“The Mabinay police is now investigating the incident. I commend Hon. Josephine Amada, Barangay Captain of Himucdungon, Mabinay, in Negros Oriental, facilitated the surrender and turn-over..” matod ni Vega.
Kasong murder ang atubangon sa suspek samtang dugang imbestigasyon usab ang himuon sa kapulisan sa maong lungsod.