Human niagas ang 20 million liters per day (MLD) nga tubig gikan sa Lusaran Water Depot paingon sa Barangay Busay, dakbayan sa Sugbo, ang Metropolitan Cebu Water District (MCWD) motrabaho sa laing tinubdan sa tubig nga gikatakdang sugdan sa dili pa matapos ning tuiga.
Si Atty. Jose Daluz III, chairman sa MCWD, nagkanayon kagahapon, Septiyembre 19, 2022, nga sa dili pa ang Nobiyembre karong tuiga, masugdan na ang pagtrabaho sa desalination plant sa Lapu-Lapu City ug sa Barangay Mambaling, dakbayan sa Sugbo.
“By the end of October we will be signing (the contract) and magsugod nasad ang actual construction unya sa Marigondon which a 30 MLD desalinated water,” matod ni Daluz.
Laing tinubdan sa tubig nga gitinguha sa MCWD mao ang 20 MLD nga desalination plant sa Vivant Hydrocore Holdings Inc (VHHI) sa lungsod sa Cordova.
Laing desalination plant, ang 25 MLD sa Barangay Mambaling ug ang 15 MLD sa Barangay Suba Basbas sa Lapu-Lapu nga pulos gitinguha sa MCWD nga masugdan karong tuiga.
Si Daluz nagkanayon nga ang ma-produce nga tubig mainom sa nahisgutang planta paliton sa MCWD og P73 matag kubico apan ang ilang baligya base sa presyo nga maoy kasamtangang gibayran sa mga konsumidor.
MIHANGOP
Sa samang higayon, ang chairman sa MCWD nihangop sa anunsyo sa administrasyon ni Mayor Michael Rama may labot sa giingong pagtukod og dam sa kompaniya sa bilyonaryong si Enrique Razon, chairman sa Manila Water Co., diin ibaligya kini sa tag P20 matag kubiko ngadto sa water district.
“I will support the program of the mayor and MCWD is always behind his back for this project because this is good for the City of Cebu kay gustohon nato og sa dili we really need a dam for our surface water, labi na ingon sila nga P20 per cubic meter,” daso ni ni Daluz.
Atol sa soft opening sa 20 MLD nga tubig gikan sa Lusaran Water Depot nga nitadlas og 30 kilometros para maabot sa Brgy. Busay, gihulagway kini ni Daluz nga usa ka selebrasyon sa kinabuhi sanglit “water is life” ug sukad pa kaniadto, karon pa makaangkon og tubig ang Busay gikan sa MCWD.