Kapulisan sa probinsya sa Sugbo nagsugod na sa ilang subsob nga kampanya batok sa illegal nga drugas human sa deklarasyon nga all-out war ni Gobernador Gwendolyn Garcia.
Ang Provincial Drug Enforcement Unit (PDEU) sa Cebu Police Provincial Office (CCPO) nakasakmit og duha ka kilong shabu sa buy-bust sa Upper Mohon, Barangay Mohon, siyudad sa Talisay sa alas 7:55 sa gabii sa Dominggo, Septiyembre 18, 2022.
Nasikop ang mga suspek nga sila si Stephen Minguito Mitante, 19, senior high school ug ang iyang uyoan nga si Jerry Minguito Bionson, 29, pulos taga Sitio Magsaysay, Barangay Suba, dakbayan sa Sugbo.
Nakuha gikan kanila ang duha ka kilo sa gituohang shabu nga adunay standard drug price (SDP) nga P13,600,000.
Matod ni Police Lieutenant Colonel Mark Gifter Sucalit, deputy provincial director for operations sa CCPO, maka-dispose og kinilo ang grupo ni Mitante, diin ang ilang area of distribution mao ang Metro Cebu ug kasikbit nga mga siyudad ug lungsod sa probinsya.
“Cebu City and Cebu province ang nakuha nato nga operational data and of course we obtained other information mga personalities involved which we cannot disclose as of this time because we are conducting follow-up operations,” matod ni Sucalit.
Gikan gihapon sa Luzon ang supply sa illegal nga drugas nga giagi “by land” nga wala lang una gipahibawo sa kapulisan kon kinsa ang supplier sa mga suspek.
Tungod sa maayo nga impormasyon nga nakuha ang mga intelligence officer sa CPPO, lakip na sa Regional Intelligence Division, Talisay City Police Station ug ang Naval Intelligence and Security Group, nahimong malampuson ang anti-drug operation.
Matod ni Sucalit nga kini ang resulta na sa ilang sub-sub nga kampanya batok sa illegal nga drugas human sa deklarasyon ni Cebu Governor Gwendolyn Garcia nga all-out war batok sa illegal nga drugas.
“This is the combined effort between the PNP, and other law enforcement agencies, and these shows our strong determination to eradicate the social menace and this is the positive report pronouncement of our good Governor Gwendolyn Garcia on her call on all-out war against illegal drugs,” dugang ni Sucalit.
Nagpadayon pa karon sa ilang imbestigasyon ang kapulisan kon kinsa pa ang mga kaubanan niini nga nag lihok sa Sugbo sanglit sila nagtuo nga sakop sa sindikato sa illegal nga drugas ang ilang nadakpan tungod sa kadako sa nakuha gikan kanila.
Gidayeg ni Police Brigadier General Roque Eduardo Vega ang kapulisan sa probinsya sa maong kalampusan.
“PRO7 strategic, operational objectives and good intelligence-driven operations have helped the police to combat crime and any security threats in the region. Let us remain vigilant, working towards a common goal of a safe and peaceful Central Visayas,” matod ni Vega.
Nimando ang heneral sa tanan niyang mga sakop nga hingusgan pa ang ilang kampanya batok sa illegal nga drugas nga maoy tinubdan sa tanang mga krimen sa nasud.