Sa unang higayon sukad sa iyang pagka professional player, linawas nga makaduwa na atubangan sa iyang kataga lungsod si Mark Jayven "Mac" Tallo sa dihang ipahigayon ang Chooks-to-Go FIBA 3x3 World Tour Cebu Masters karong Oktobre 1-2, 2022 sa SM Seaside City sa South Road Project (SRP), dakbayan sa Sugbo.
"Sobra ka Excited. To play and represent where I started basketball is such an Honor. Murag dili gani gyud ko kapoyon ana na moduwa ko sa akong hometown. Thinking about it murag mo lukso akong dugo," matod ni Tallo sa online interview sa Superbalita.
Giangkon sa 28-anyos nga flashy-pointguard nga ning higayona makasinati siya og grabing pressure apan andam siyang mohangop niini.
"This is my first time. Grabe ang pressure pero Im embracing it, kay mao mani ang last biggest event this year sa chooks," dugang sa produkto sa Southwestern Universities (SWU) Cobras kinsa mao karon ang no.1 3x3 player sa nasod. "So Im making the best out of it"
Gipaabot nga ikauban ni Tallo sa Cebu Chooks-to-Go sila si Brandon Ramirez, Vince Tolentino ug import nga si Mike Nzeusseu.
Hinuon iyang gipasabot nga posibli usab nga adunay kausaban sa ilang lineup ug posibling i-activate og balik ang laing Sugboanong si Zachary Huang puli kang Tolentino.
Si Tallo nahimong professional player niadtong 2017 sa dihang gipili siya sa TNT KaTropa isip 10th overall sa PBA Draft niadtong tuiga.
Gi-trade siya sa NLEX Road Warriors niadtong 2018-19 ug nakaduwa usab siya sa pipila ka mga teams sa MPBL.
Ang Cebu Chooks to Go Team gikatakdang moabot sa, Martes Septiyembre 20, 2022 sa Sugbo diin sila mopahigayon sa ilang ensayo sulod sa kapin usa ka semana sa dili pa ang kompetisyon.
Ang World Tour Cebu Masters nga salmotan usab sa mga teams gikan sa laing nasod, maoy usa sa duha ka kabahin sa sporting events nga ipahigayon sa ika-25 nga anibersaryo sa Chooks to Go.
Sa niaging Septiyembre 16, 2022, natigayon usab ang Chooks-to-Go Pilipinas 3X3 International Quest didto sa Ayala Malls Solenad sa Santa Rosa, Laguna.
Sa maong edisyon, pakyas si Tallo ug ang Cebu Chooks-to-Go pagsulod sa quarterfinals. (JBM)