DILI pa epektibo sa Davao City ang gikataho nga umento sa plitehan sa mga public utility jeepney, bus, ug uban pang pampublikong transportasyon.
Kini ang gibutyag ni Land Transportation Franchising and Regulatory Board (LTFRB) Davao Region Director Nonito Llanos III atol sa Davao City Disaster Radio Madayaw Program niadtong Lunes, Septyembre 19, 2022.
Sumala sa opisyal nga lagmit, ang Davao Region wala gani maapil sa mga lugar nga giaprobahan ang pagsaka sa plitehan.
Gibutyag sab sa opisyal nga wala pay opisyal nga anunsyo gikan sa LTFRB Central office bahin sa pagsaka sa plitehan alang ngari sa Davao City.
Matud ni Llanos nga importanteng susihon ang mga opisyal nga dokumento tungod kay ilang gitug-an ang rason sa pag-usbaw sa plitehan base sa mga pagtuon nga gihimo sa LTFRB.
Ang opisyal nga dokumento mao usab ang magdetalye sa applicability sa balaod, nationwide man o rehiyonal o alang lamang niadtong misang-at sa petisyon.
Sumala ni Llanos nga ang LTFRB, una nang nikonsulta sa National Economic Development Authority (Neda) sa wala pa kini nipagawas og fare hike orders.
"Wala pa po'y gipagawas nga official statement ang LTFRB. Akong gitan-aw ang opisyal nga kamandoan sa atoang Central office pinaagi sa atoang website, unfortunately, wala pa'y nigawas nga official nga papel, either a board resolution or memorandum circular gikan sa Central Office," ingon ni Llanos.
Dugang pa ni Llanos nga sa Davao Region, wala silay nadawat nga petisyon gikan sa bisan unsang transport group alang sa usbaw sa plitehan.
"Ang akoa lang mahatag nga information nga ipahibalo, Davao Region wala ta’y nadawat nga even usa ka petition. Wala pud ko nakahibawo nga duna'y petitions nga submitted to the central office from our region nga gi-direct didto sa central office," ni Llanos.
Iyang gihangyo ang publiko nga hulaton una ang pagluwat og kamandoan.
"Mohangyo ko sa atong kaigsuonan nga huwat-huwat lang usa ta sa unsa ang kamandoan kay og nakita sa LTFRB ang epekto sa pagsaka sa petrolyo kinahanglan nationwide even though walay petition diri sa Region 11," pagpasabot ni Llanos. (Uban sa taho sa City Information Office)