Nagpadayon karon ang pagsaulog sa mga sakop sa media sa Sugbo sa Cebu Press Freedom Week 2022. Nasayod kita nga ang labing kumon nga kaso nga masugatan sa mga sakop sa media mao ang libelo ubos sa Revised Penal Code (RPC).
Ang popular kaayo nga si anhing Bobby Nalzaro nag-atubang og labing menos 30 ka mga kaso sa libelo. Apan wa hinuon siya makonbikto. Kon duna may pending nga kaso, nawagtang na kay sa pagkamatay sa akusado, mawagtang man sab ang criminal liability.
Ang prescription sa kasong libelo usa ka tuig subay sa Article 90, RPC. Buot ipasabot, gikan sa pagpatik o pagsibya sa usa ka butang nga matawag nga libelo, mawagtang o mohupas kini paglabay sa usa ka tuig. Di na makiha ang naghimo niini.
Nitumaw karon ang pangutana kon unsa ang prescriptive period sa cyberlibel kay ang Republic Act No. 10175, ang Cybercrime Prevention Act of 2012, nagpahamtang man sa one degree higher nga silot sa cyberlibel.
Gituki kini ni Retired Senior Associate Justice Antonio T. Carpio sa Supreme Court. Matod pa niya, adunay duha ka legal theories bahin niini. Ang unang theory mao ang 12 ka tuig nga prescriptive period sa cyberlibel kay ang Republic Act No. 10175 usa man ka special law ug wa magbutang sa iyang prescriptive period.
Sa maong mga kaso, ang subayon mao ang Act No. 3326 nga maoy nagbutang og prescriptive period niadtong mga balaod nga wa magbutang og prescriptive period. Subay sa Act No. 3326, 12 anyos ang prescriptive period sa mga krimen kansang silot mao ang pagkapriso sa unom ka tuig pataas.
Sa ato nang giingon ang Cybercrime Prevention Act nagmando nga ang silot sa cyberlibel “one (1) degree higher” sa gipahamtang sa RPC. Ang silot sa print o broadcast libel ubos sa RPC mao ang prision correccional, kansang maximum imprisonment unom ka tuig.
Ang one degree higher nga silot ubos sa RA No. 10175 mao ang prision mayor, kansang maximum imprisonment 12 ka tuig. Sa ato pa, ang prescriptive period sa cyberlibel 12 ka tuig kon ang Act No. 3326 maoy subayon.
Ang ikaduhang theory, matod pa ni Justice Carpio, mao ang usa ka tuig nga prescriptive period nga giduso ni Dean Mel Sta. Maria sa Far Eastern University (FEU) Law Institute. Ang gibasihan niini mao nga ang cyberlibel usa ka krimen nga giila ug gisilotan ubos sa RPC.
Ang paghimo sa maong krimen ginamit ang internet usa lang ka qualifying circumstance aron umentohan ang silot og one degree higher. Tungod niini, ang prescriptive period sa cyberlibel magsubay sa RPC nga naglatid sa iyang kaugalingon nga prescriptive periods. Ang Article 90 sa RPC nagkanayon, “the crime of libel and other similar offenses shall prescribe in one year.”
Pabor si Justice Carpio sa one-year theory nga prescriptive period sa cyberlibel. Usa sa iyang gibasihan mao ang kaso nga Disini v. Secretary of Justice (2014) nga nagtuki sa constitutionality sa Cybercrime Prevention Act. Matod pa sa Supreme Court en banc, “cyberlibel is actually not a new crime since Article 353 of the penal code, in relation to Article 355, already punishes it.” - edbarrita@gmail.com