Daghan ang natingala sa nahitabo ni kanhi Executive Secretary (ES) Atty. Vic Rodriguez, nga bag-o pa lang ni-resign isip ES unya gitudlo ra usab dayon nga Chief of Staff sa Office of the President.
Ni-resign siya kay matod pa niya nagkinahanglan siya og oras o panahon aron magahin ug magugol niya sa iyang pamilya. Apan gidawat niya ang bag-ong posisyon nga gihatag kaniya. Tingali, wa siyay oras sa pamilya kon ES siya pero aduna siyay oras kon Chief of Staff lang siya.
* * *
Matod sa balita, dunay gipangayo nga dugang “trabaho” si Rodriguez isip Chief of Staff sama sa “trabaho” sa pag-review, paghimo og recommendations ug “trabaho” sa pagmando sa ubang ahensiya sa kagamhanan.
Apan gibabagan kini ni Chief Presidential Legal Counsel nga si kanhi Senador Juan Ponce Enrile ug matod pa, napugngan gyod ang pagkuha sa dugang gahom.
Ang resulta, nahimo na lang nga sama sa “overseer” o manager si Rodriguez sa opisina sa Presidente. Naputlan sa pako ug dili na gamhanan sama sa kanhi trabaho niya isip executive secretary.
Daghang pangutana nga naghulat sa tubag.
* * *
Unsay hinungdan nga gidawat sa Presidente ang resignation ni Rodriguez? Aduna ba siyay nahimo nga maoy hinungdan sa iyang pagkatangtang?
Dili pa lang dugay, migawas ang pangalan ni Rodriguez sa dihang nagpagawas ang Board sa Sugar Regulatory Administration (SRA) og usa ka resolution nga mo-import og asukar gikan sa gawas apan wala kini uyoni sa Presidente.
Nigawas usab ang pangalan ni Rodriguez sa dihang dihay kontrobersiya mahitungod sa pagkatudlo sa bag-ong pangulo sa Philippine Ports Authority (PPA).
Simple lang ang akong nahibaw-an sa panerbisyo. Kon maayo ang record, gantihan unya ampingan aron mopadayon sa pag-alagad. Apan kon makasala o makabuhat og dili maayo, silotan ug pangitaan og paagi nga dili na makabuhat og susama pa nga panghitabo.
Unsa man kaha?
* * *
Adunay niduol nako ug nanghambog sa iyang ”konek sa taas.” Kaya kuno kaayo niya mopasulod og trabaho kay gamhanan ang iyang principal. Wa siya motug-an sa dihang nangutana ko kon kinsay iyang principal.
Mibagting dayon akong radar.
Pananglit magpatabang ko nimo, ako gisultian, unsa may akong obligasyon?
Ah, duna mi gamay pangayuon, murag plete ba, pero segurado na gyod nang imong gusto sudlan nga trabaho, matod niya.
Salamat na lang, Bay, akong gisultian. Kinsa kaha ang principal nga iyang gipasabot?