Floyd mokita og P28 billion

Floyd Mayweather Jr.. (File photo)
Floyd Mayweather Jr.. (File photo)

Gibana-banang moabot sa $500 million o kapin sa P28 billion (base sa peso-dollar exchange rate) ang kinatibuk-ang mabulsa ni American boxing legend Floyd Mayweather Jr. gikan sa exhibition bouts.

Basi sa mga numero nga giihap sa World Boxing News, nagsubay sa tul-id nga dalan si Mayweather paingon sa half billion dollars.

Si Mayweather, kinsa niretiro sa professional boxing nga wala’y pilde sulod sa 50 ka mga away, unang nihamag og exhibition bout niadtong 2018.

Sa kasamtangan, dul-an na sa $100 million ang nakuha ni Mayweather gikan sa iyang post-professional fights.

Sa labing ulahing exhibition bout sa gitawag og Pretty Boy, nakabulsa kini og $9.9 million.

Sa iyang pagpakig-away sa bantugang YouTuber nga si Logan Paul, ang gianggaan sab og “Money” nga boksidor, nakadawat og naglagiting nga $65 million.

Sa sayong bahin sa tuig 2022, nakakuha si Mayweather og $20 million sa iyang away batok kang Don Moore.

Karong Septiyembre 26, 2022 (PH time), moaway na sab og laing exhibition bout si Mayweather batok kang Mikuru Asakura sa RIZIN 38.

Gikuwenta sab sa WBN ang posibleng makuha ni Mayweather kon madayon ang exhibition fights niini batok ni YouTuber Deji ug Filipino boxing legend Manny Pacquiao.

Sa bana-bana sa WBN, mosulbong ngadto sa kapin sa $200 million ang kitaon ni Mayweather ning duha ka exhibition bouts.

Si Mayweather, kinsa nag-edad og 45, gituohang padayon nga mamunit og kuwarta gikan sa exhibition bouts sa magsunod nga dekada.

“For now, I’m happily retired. You never know. But it would have to be worth it,” batbat pa ni Mayweather nga napatik sa WBN.

“Just like gambling, right? Juice worth the squeeze no matter who the opponent is.”

Alang ni Mayweather, nakulit na sa bato ang iyang legasiya sa professional boxing ug malipayon siya nga padayon siyang nakahatag og lingaw sa boxing fans sa kalibutan pinaagi sa exhibition fights.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph