ALANG sa mga beneficiaries sa Tulong Panghanapbuhay sa Ating Disadvantaged and Displaced Workers (TUPAD) sa unang distrito sa Davao City, ang buhatan ni First District Congressman Paolo Duterte, kauban ang Department of Labor and Employment (DOLE), mihimo na og profiling kagahapong adlawa, Septyembre 21, 2022.

Sa wala nakaadto sa maong takna, mamahimo nga mangutana sa buhatan sa kongresista nga anaa nahimutang sa dalang Ponciano ning siyudad sa Davao.

Nasayran nga ang mga beneficiaries mga trabahante gikan sa mga salon, barbershops, street vendors, school maintenance ug janitors, scrap collectors, dressmakers, shoemakers, therapists, cockfight bet collectors, indigents, displaced workers ug pamilya sa mga Person Deprived of Liberty (PDL).

Ang TUPAD usa ka community–based package assistance nga maghatag og emergency employment sa mga nawad-an og trabaho, walay trabaho ug kadtong dili permanente ang trabaho.

Suweldohan ang mga beneficiaries pinaagi sa trabaho nga gihatag kanila sulod sa napulo ka adlaw apan dili mosobra sa 30-diyas.

Padayon ang pagtabang ni Cong. Duterte sa mga indibiduwal nga naapektuhan sa crisis nga hatud sa pandemya tungod sa Covid-19.

Una nang nakadawat ang mga tricycle ug PUJ drivers apil ang mga operators gikan sa tulo ka mga distrito sa Davao City pinaagi sa programa sa kongresista.