GISUGYOT sa mga konsehal sa Siyudad sa Davao nga mangita og laing bag-ong water utility service provider aron nga mapalambo pa ang serbisyo sa tubig.
Kini human nga mga konsumante sa Davao City Water District (DCWD) nakasianti og di maayong serbisyo sa tubig sa miaging semana.
Mga konsehal nga sila Bernie Al-ag ug Conrado Baluran maoy maoy mihimo sa sugyot atol sa regular session niadtong Martes sa buntag, Septyembre 20, 2022.
Gisulti ni Al-ag said nga ang siyudad kinahanglan nga magtugot sa pagserbisyo sa laing franchisee aron nga mga Dabawenyo dunay laing alternatibo.
"Maybe it's time to open the franchise to other water providers in the city. If we only have one choice, kung may palpak, unsa man atong mahimo, muadto lang ta'g opisina na wa'y ligo. We'll just have to accept that," matud ni Al-ag.
Ang konsehal nagsulti nga ang Konseho dunay gahum nga mohatag og prangkisa sa laing kompaniya sa paghatag og serbisyo sa tubig.
Samtang si Baluran naghisgut nga ang gisulti ug sugyot ni Al-ag ipasar alang sa unang pagbasa ug iduso pinaagi sa pagdungog sa komite.
Miuyon sab si Konsehal Diosdado Mahipus, Jr. nga ang siyudad angay nang magkonsidera nga motugot og laing mosuplay og tubig.
Kaniadto ang siyudad mi-aproba og prangkisa sa Helpmate Incorporated, apan ang ilang operasyon limitado lamang sa Buhangin Distict.
Matud ni Mahipus nga ang Helpmate nagtinguha nga palapdan ang ilang operasyon "not to compete with DCWD, but to complement" sa ilang serbisyo pinaagi sa paghatag ngadto kanila sa mga lugar nga di maserbisyohan niini.
Apan si Hyde Reyes Laspiñas, DCWD Head of production, atol sa suspended rules, nipasalig nga kung ang Davao City Bulk Water Supply Project (DCBWSP) mo-epekto na, lauman sa mga konsumante og mas maayong serbisyo sa tubig.
"If the Bulk Water would really be operational, we can say that 24/7 all Dabawenyos will be given safe water," pasalig ni Laspiñas.
Dugang pa niya nga "If the 300 million liters per day, which will be given by Apo Agua [Infrastructura], that can suffice to the need of the city."
Ang P12-bilyon nga DCBWSP magkuha sa Tamugan River isip daktong tinubdan sa tubig alang sa sistema ug gibanabana nga makasuplay og 300 hangtud 345 milyon litros og tubig matag adlaw. Kini usa ka joint project sa DCWD ug sa Apo Agua Infrastructura.
Apan giklaro ni Laspiñas nga abli sila nga dunay laing mokompetensiya nga water utility sa dakbayan.
Samtang nipasar ang Konseho og resolusyon nga nag-imbitar sa Apo Agua nga motambong sa sunod nga regular session.
Gisulti ni Davao City Mayor Sebastian Duterte sa paghinabi kaniya sa radyo kagahapon, Septyembre 21, nga ang kompaniya gilauman nga mohatag og katikaran bahin sa Bulk Water project sa sunod semana.