Sila ang mga singing champion sa nagkadaiyang reality shows nga nibalhin og laing network human sa ilang kadaugan. Matawag ba nga wala silay utang kabubut-on o mao gyud ni duwa sa showbiz? Tan-awa kon kinsa ug asa na sila karon.

ZEPHANIE DIMARANAN

Trending topic sa Twitter ang guesting ni Vice Ganda sa grand finals sa Idol Philippines Season 2 niadtong Dominggo tungod sa mensahe ni Vice sa winner nga, “Sana mag-stay ka muna dito sa network na to.” Daghan ang nagtuo nga si Zephanie Dimaranan ang iyang gipasabot nga nikampiyon sa Idol Philippines Season 1 apan nipirma og exclusive contract sa GMA.

SARAH GERONIMO

Si Sarah G ang grand champion sa 2003 Star For A Night, ang reality singing competition sa Viva Television sa IBC-13. Si Sarah nigawas sa Sunday variety show nga SOP sa GMA-7 apan paglabay sa usa ka tuig nibalhin sa ABS-CBN. Adunay tsismis nga mobalik siya sa Kapuso apan giingong wala lang madayon.

RACHELLE ANN GO

Si Rachelle ang grand champion sa 2004 Search for a Star nga co-produced sa Viva ug GMA. Apan sama ni Sarah G, nibalhin sab dayon ni sa ABS-CBN. Pag-2010 nibalik si Rachelle sa GMA apan pag-2014 subli siyang nibiya human nadawat sa Miss Saigon sa London nga maoy nagbukas sa iyang career sa broadway.

REGINE VELASQUEZ

Produkto usab sa reality show si Regine Velasquez isip grand champion sa “Ang Bagong Kampeon” niadtong 1984. Sulod sa duha ka dekada nagrayna sa GMA-7 ang Asia’s Songbird mao nga grabeng saway ang iyang nahiaguman dihang nag-ober da bakod ni sa ABS-CBN niadtong 2018.

MORISSETTE AMON

Ang Cebuana singer unang nadiskubre isip first runner-up sa TV5’s Star Factor niadtong 2010. Apan sa interbyu sa Superbalita, si Morissette niangkon nga mas daghan ang nakaila niya pagbalhin niya sa ABS-CBN. Wala man siya kadaug sa The Voice of the Philippines niadtong 2013 apan usa siya sa mga nagmalampuson sa ilang batch.

MITOY YONTING

Si Mitoy nadiskubre sa Eat Bulaga segment nga “Ikaw at Echo” diin nikanta siya og Air Supply. Pila ka tuig nahimong Kapuso ug co-host sa Eat Bulaga si Mitoy. Apan mas nisikat siya sa 2013 The Voice of the Philippines Season 1 sa ABS-CBN diin siya ang nagkampiyon. Si Mitoy makita karon sa TV5 isip co-host sa “Lunch Out Loud.”

JONALYN VIRAY

Si Jonalyn Viray ang unang Pinoy Pop Superstar grand champion sa GMA niadtong May 2005. Naila usab siya sa singing trio nga La Diva. Sagad sa mga teleserye sa GMA niadto si Viray ang nikanta. Apan nakurat ang showbiz dihang kalit siyang nibalhin sa ABS-CBN niadtong 2016. Sama ni Morissette, si Jonalyn naa sab karon sa TV5 isip guest judge sa “Sing Galing.”

“KYLA”

Si Kyla o Melanie Calumpad-Alvarez sa tinuod nga kinabuhi nadiskubre dihang gideklarar siya nga grand champion sa 1993 Tanghalan ng Kampiyon nga gi-host nilang Pilita Corrales ug Bert Marcelo sa RPN9. Niadtong 2015 ang nailang “Queen of RnB” nipirma sa Cornerstone Entertainment ug nibalhin sa ABS-CBN human sa 15 katuig niya sa Kapuso Network.