Gidili sa Kagamhanan sa Probinsya sa Sugbo ang pagkaligo ug pagpahigayon og tourism activities sa kadagatan sa Cordova.

Kini gipasubay sa giluwatang lagda ni Cebu Governor Gwendolyn Garcia nga mao ang Executive Order (EO) No. 35 sa Septiyembre 20, 2022.

Sa nasayran, usa ang kadagatan sa Barangay Catarman sa mga nadiskubrihan nga dili luwas kaligoan o mosawom tungod sa taas nga lebel sa fecal coliform ug mahimong makarisgo sa panglawas sa mga nangaligo.

Subay sa labing uwahing lagda, gi-identify niini ang di momenos walo ka coastal areas sa Barangay Catarman nga nasusi na sa Environmental Management Bureau in Central Visayas (EMB-7).

“There is an urgent need to immediately prohibit public swimming and similar activities found within the coastal waters of Cordova, Cebu delineated by the above technical descriptions,” tipik sa natala sa EO ni Garcia sa Septiyembre 20, 2022.

Una nang gibasol sa mga awtoridad ang floating ug fixed cottages sa lungsod nga maoy gigikanan sa hugaw sa kadagatan.

Ang lokal nga kagamhanan nimando na usab sa pagpaguba sa tanang mga estruktura ilabi na kadtong nagtungtong sa baybayon nga nakalapas sa easement zones.