Rabacal: Mga inilang babaye sa pulitika

Rabacal: Mga inilang babaye sa pulitika

Kini ang mga babaye nga naila sa natad sa pulitika sa nasud. Bise Presidente Sara Vicenta Zimmerman Duterte-Carpio nga mas nailang Inday Sara, 44 anyos, abogado ug kanhi Davao City mayor. Siya maoy ikatulong babaye sa 15 ka nahimong bise presidente sa Pilipinas. Nakakuha siyag 32,208,417 botos kun 61.53% sa tanang botos sa vice presidential race. Inila usab ang maguwang ni PBBM nga si Senador Maria Imelda Josefa “Imee” Romualdez Marcos, 66 anyos. Napili na siyang kongresista ug gobernador hangtud napiling senador niadtong 2019.

Gidungog siya na nga maoy mahimong bise ni Inday Sara kon nahinayon pa kini paglansar pagka-presidente. Gituhoan nga siya na maoy makaatbang ni VP Sara sa umaabut nga presidential election. Lain mao si Senador Cynthia Aguilar Villar, 72. Nahimo siyang kongresista usa siya napiling senador niadtong 2013. Asawa siya ni kanhi Senate President Manuel “Manny” Bamba Villar, Jr., naila nga labing adunahang Pilipino, nga napildi ni Presidente Benigno “Noynoy” Aquino sa dihang midagan sa pagka-presidente niadtong 2010. Si Senador Cynthia napakyas sa iyang paninguha nga mahimong Senate president niining 19th Congress nga gihuptan karon ni Senate President Juan Miguel “Migs” Zubiri.

Usa ka Cebuana, Gov. Gwendolyn “Gwen” Fiel Garcia, 66 anyos, ang bugtong babayeng napiling gobernador sa Cebu Province. Napili siya nga kongresista human sa iyang termino pagka-gobernador gikan sa 2004 ngadto sa 2013. Midaug siya niadtong miaging piniliay batok kang kanhi Tourism secretary Ace Durano. Sa wala damha ang anak ni Gov. Garcia nga si Liloan Mayor Ma. Christina Codilla Frasco gitudlo ni PBBM nga Tourism Secretary. Bisan kon wala kaayoy national exposure si Gov. Gwen apan nadungog usab ang iyang ngalan sa dihang nagkagubot ang kongreso sa dihang giilisdan si Speaker Pantaleon Pantaleon D. Alvarez.

Laing mga women politicians mao sila si Senador Grace Poe, Senador Risa Hontiveros ug Senador Loren Legarda. Si Poe napildi na sa dihang milansar pagka-presidente samtang si Legarda naparut usab sa dihang midagan sa pagka-bise presidente. Si Hontiveros nangiwit sa miaging senatorial election.

Top-heavy kining sakop sa Cebu City Advisory Council nga ginsakpan nila ni kanhi Department of Natural Resources (DENR) Secretary Roy Cimatu, kanhi Philippine National Police (PNP) Chief Debold Sinas, Retired General Melquiades Feliciano, kanhi Senador Franklin Drilon ug kanhi Department of Public Works (DPWH) Secretary Rogelio Singson. Nagtuo ako nga dakug mahimo kining maong grupo aron sa pagsulbar sa mga problema sa kalikupan sa Cebu City. Giangkon ni Cimatu nga dili madali paghuman kining ilang gimbuhaton apan maayo na kaayo nga masugdan kini. Gisugyot usab ni Cimatu nga inay “Singapore-like City” tawgon kining “New Cebu City.” Ang Singapore maoy himuong inspirasyon apan ang New Cebu City maoy i-turnover sa mosunod nga henerasyon, sumala ni Cimatu. Uyon ako niining maong sugyot. (mannyrabacal1144@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph