Ipatawag sa Mabolo Police Station ang mga tinun-an sa Mabolo National High School nga mga sakop sa Crips ug Bloods gang nga nagbangi sa milabay nga semana.
Una nang gipatawag ang mga ginikanan sa tulo ka mga tinun-an nga kauban sa pagdunggab sa menor de edad ug nitug-an kini kinsa ang ilang mga kauban.
Matod ni Police Lieutenant Colonel Wilbert Parilla, deputy city director for administration sa Cebu City Police Office (CCPO), ang mga tinun-an nga sakop sa duha ka mga gang tigumon sa sulod sa eskwelahan aron ilusad ang dayalogo uban sa mga magtutudlo, principal ug guidance counselor.
Tinguha nila nga mapasabot sa maong mga tinun-an ang sangpotanan kon magpadayon sila nga miyembro sa maong gang.
Ila usab nga gihinabi ang mga ginikanan nga sila na mismo ang mobadlong sa ilang mga anak nga dili mopadayon sa pagpamiyembro sa grupo.
Gihulagway ni Parilla nga daghan ang ningsulod sa Crips ug Bloods sa Mabolo National High School nga angay hatagan sa dinalian nga sulosyon aron dili mosangpot sa dakong problema.
“Ipatawag tanan, unya ipatawag sad ang tanang ginikanan aron ilang sultihan ang ilang mga anak nga sila na mismo ang ginikanan maoy mobadlong sa ilang mga anak nga dili na moapil ani nga grupo,” matod ni Parilla.
Sa pamahayag sa usa sa mga estudyante, nagsugod sila sa ilang grupo sa dihang nag online classes sila sulod sa kapin duha tuig.
Sa dihang nibalik na ang face-to-face classes, nibalik usab ang bangi sa duha ka mga gang nga niresulta na sa pagsinakitay.
Samtang ang ginikanan sa menor de edad nga tinun-an nga gidunggab sa tulo ka lalaki sa gawas sa tunghaan sa Mabolo mokiha kanila.