Gwen mibarog pagpanag-iya sa Probinsiya sa 25 ka ektaryang luna sa Brgy. Jagobiao

DOKUMENTO: Si Gob. Gwendolyn Garcia nipakita sa dokumento sa pagpama­tuod nga gipanag-iya sa Probinsiya sa Sugbo ang 25 ka ektaryang luna sa Brgy. Jagobiao, dakbayan sa Mandaue atol sa press conference sa Kapitolyo kagahapon, Septiyembre 22, 2022. / Arvie N. Veloso
DOKUMENTO: Si Gob. Gwendolyn Garcia nipakita sa dokumento sa pagpama­tuod nga gipanag-iya sa Probinsiya sa Sugbo ang 25 ka ektaryang luna sa Brgy. Jagobiao, dakbayan sa Mandaue atol sa press conference sa Kapitolyo kagahapon, Septiyembre 22, 2022. / Arvie N. Veloso

Gibarugan ni Cebu Governor Gwendolyn Garcia ang pagpanag-iya sa Probinsya sa Sugbo sa 25 ka ektaryang luna sa Barangay Jagobiao, dakbayan sa Mandaue diin kasamtangang nahimutang ang Eversely Child Sanitarium ug ubang mga pasilidad sa kagamhanan.

Atol sa press conference sa Kapitolyo kagahapon, Septiyembre 22, 2022, gipakita sa gobernador ang giingong kompletong mga dokumento niini sa pagpanag-iya sa maong luna.

“Why am I fighting for this? Well... there is clear evidence that (the property) rightfully belongs to Cebu Province... Di na ako, sa Probinsya na,” matud ni Garcia.

Buot niya nga ilhon ug himuong lehitimo sa hospital executives ug concerned national government agencies ang paggamit sa luna sa Probinsya.

“They kept on insisting nga wala but you can’t deny on documentary evidence. If mo insist mo nga dili na amo, inyo na, what documents can you show to prove nga inyo na?,” matud ni Garcia.

Subay niini, nitanyag ang Kagamhanan sa Probinsya nga mosulod sa usufruct agreement ang concerned agencies isip kompromiso.

Atol sa pakighinabi sa mga tigbalita, giladlad ni Garcia ang mga dokumento nga naglakip sa orihinal nga deed of donation ni kanhi Cebu bishop, Msgr. Juan Gorordo sa Hunyo 30, 1930 ingon man ang deed of acceptance ubos sa administrasyon ni kanhi gob. Mariano Jesus Cuenco pinaagi sa resolusyon nga giluwatan sa Hunta Probinsyal sa pagdawat sa donasyon.

Niluwat og notice to vacate ang Kapitolyo sa Eversley Child’s Sanitarium sa Septiyembre 8, 2022, nga usa sa mga dakong tambalanan nga gipanag-iya sa gobiyerno.

Lakip sa gipadad-an og notisya mao ang hepe sa Department of Health - Treatment and Rehabilitation Center (DOH-TRC) Cebu City, ug barangay kapitan alang sa barangay hall, sa pagbiya sa luna sulod sa 15 ka adlaw human sa pagdawat sa demand letter.

Matod ni Garcia nga dugay na siyang nipatawag og tigom sa Hunyo ning tuiga ug nipada og suwat sa mga pangulo sa edipisyo nga nanurok sa naasoyng luna, apan napakyas kini sa pagtubag gawas lang sa National Housing Authority (NHA) nga nipadangat sa ilang pagsanong.

“We will respect Presidential Proclamation No. 1772... Kana nga yuta, pagabayran na sa NHA. Mosulod na dire sa coffers of the Province. Makapuno na sa atong gipanghimo nga kadalanan, patubig ug mga tulay... mahibalik na sa katawhan,” matud ni Garcia.

Gibauran niini ang mga opisyal nga giingong ‘playing the victim’ nga mahimong dad-on niya ang hisgutanan sa korte.

“Di mo papahawa-on. Ayaw tuisa ang issue. Pirma og usufruct under DOH (Department of Health), wa tay problema. (But) for as long as di mo i-recognize sa Province of Cebu, then I will have to assert our ownership,” dugang niya.

Gawas sa tambalanan, may mga pribadong residente usab nga namuyo sa bahin duol sa naasoyng tambalanan ubos sa Proclamation No. 1772 nga giamendahan ni kanhi Pres. Gloria Macapagal Arroyo.

Apan gisaad ni Garcia nga ang mga residente dili mawad-an og pinuy-anan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph