Ang Visayan Electric residential customers makasinati og 13-sentabos nga umento matag kilowatt hour alang sa billing month sa Septiyembre-Oktubre.
Ang average rate sa residential customers anaa na sa P15.37/kWh gikan sa average rate nga P15.24/kWh sa August - September billing period.
Ang bag-ong rate nagkahulogan ngadto sa P26 nga usbaw alang sa mga kustomer nga adunay average nga binuwan nga konsumo sa kuryente nga 200kWh.
Ang taas nga presyo sa coal sa merkado sa kalibotan padayong nag-unang hinungdan sa taas nga presyo sa kuryente.
Gipasamot kini sa pag-adjust sa subsidy sa gobyerno alang sa missionary electrification ug buhis sa pagpalit og kuryente human mapupos ang kontrata sa Power Sector Assets and Liabilities Management Corporation (PSALM).
Ang Energy Regulatory Commission, sa usa ka resolusyon nga giaprobahan niadtong Agusto 4, 2022, niaprobar sa hangyo sa National Power Corporation nga mabawi ang kakuwang gikan sa Universal Charge – Missionary Electrification (UC-ME) nga subsidy para sa 2012 sa kantidad nga P2,606,208,364.83, nga adunay equivalent rate nga P0.0239/kWh.
Niadtong Lunes, Septiyembre 19, si Veco CEO ug president Raul Lucero, nipasabot nga ang gubat sa Ukraine ug Russia dunay epekto sa presyo sa coal nga nakaapekto usab sa presyo sa kuryente. Matod niya nga ang mga nasod sa Europe adto na namalit og coal sa Indonesia busa mimahal ang presyo niini.
Niini, nipahimangno si Lucero nga hayan mosaka pa ang presyo sa kuryente sa mosunod nga mga buwan. (REV gikan sa PR)