TAPUSON na sa Department of Social Welfare and Development Davao Region (DSWD-Davao) ang pagpanghatag sa P26 milyon nga badyet gikan sa Regional Office isip gialokar nga dugang badyet sa educational assistance ubos sa Assistance to Individuals in Crisis Situations (AICS) program sa Septyembre 24, 2022.

"Ang 74 million po ang budget so utilized na po lahat from the Central Office but may augmentation funds from the Regional Office. Expected amount natin is over P100 million for Davao Region," matud ni Vanessa Goc-ong sa text message sa SunStar Davao Septyembre 22, 2002.

Gisulti ni Goc-ong nga ila nang nahatag ang kinatibuk-ang P80,907,000 ngadto sa 35, 933 ka benepisyaryo sa tibuok rehiyon sukad Septyemre 17, 2022.

Matud niya nga sa Regional Office, nakaserbisyo na sila og 11,165 benepisyaryo uban sa sumada nga ₱26,598,000; Davao del Norte dunay 5,254 ka benepisyaryo nga nahatagan og P11,613,000; Davao de Oro nga dunay 5,270 benepisyaryo ug kantidad nga P12,187,000.

Ang Davao Oriental dunay 4,701 kinsa nakadawat og educational assistance kantidad og P10,475,000, Davao del Sur dunay 5,418 benepisyaryo ug kinatibuk-ang nahatag nga kantidad nga P10,915,000, ug Davao Occidental nga dunay 4,125 ka benepisyaryo nga dunay kinatibuk-ang nareles nga P9,119,000.

Gikompirma ni Goc-ong nga ang katapusang adlaw sa disbursement sa Sabado, Septyembre 24.

Samtang gisulti ni Goc-ong nga duna silay gipangbalibaran nga pipila ka mga aplikasyon.

"Common reasons for rejection are incomplete documentary requirements and meron po hindi qualified based sa criteria," tug-an niya.

Dugang pa niya nga ang ebalwasiyon nagpadayon gihapon alang sa dugang mga tinun-an nga makadawat og tabang pinansiyal.

"For those who cannot avail, per directive from Central Office ipa-intindi lang na limited budget lang po," tin-aw ni Goc-ong.