ANG lokal nga panggamhanan sa dakbayan sa Davao opisyal nang nagsagop sa Presidential Executive Order No. 03 pinaagi sa Executive Order (EO) No. 43-2022 nga nagtugot sa boluntaryong pagsul-ob og face masks sa bukas nga mga lugar.
Bisan tuod kon ang polisiya gipatuman na niadtong Septyembre 12, wala pa kini gisunod hangtud Septyembre 21 tungod kay wala pa makapagawas ang siyudad sa EO "An order adopting Presidential Executive Order No. 03 allowing the voluntary wearing of face masks in outdoor settings and reiterating the continued implementation of the minimum public health standards in Davao City during the state of public health emergency relative to the Covid-19 pandemic."
Ang EO nagpahimug-at nga ang opsiyonal nga pagsul-ob og face masks mahimo lang buhaton sa mga bukas nga lugar ug di daghang tawo nga mga dapit nga dunay maayong bentilasyon busa ang face masks sa mga indoor private o pampubliko nga establisemento naglakip sa public transportation sa kayutaan, kahanginan, o kadagatan gikinahanglan gihapon.
"Not fully-vaccinated individuals, senior citizens, and immunocompromised individuals are highly encouraged to wear their masks," subay sa Section 2 sa EO nagkanayon.
Gawas sa opsiyonal nga pagsul-ob sa face masks, ang maong EO subling nag-awhag sa pagpatuman sa minimum public health standards (MPHS) tungod kay ang Davao City naa pa ilawom sa state of public health emergency tungod sa Covid-19 pandemic.
Ang mandatory nga pagsul-ob og face masks sa tanang mga lugar ipatuman gihapon sa Davao City Police Office, Task Force Davao, City Health Office, opisyales sa barangay, ug uban pang law enforcers pinasubay sa City Ordinance No. 0307 Series of 2020.
Kadtong mosupak sa pahamtangan og silot nga naglakip sa multa nga P500 alang sa unang kalapasan, P2,000 sa ikaduha, ug P5,000 o pagpriso og usa ka bulan alang sa ikatulong kalapasan.