ARON nga mas matabangan pa ang mga programa sa Sustainable Livelihood Program (SLP) Associations sa Department of Social Welfare and Development (DSWD), ang ahensiya niini sa Davao Region nakigtambayayong sa Securities and Exchange Commission (SEC) Davao Extension Office sa paghatag og teknikal nga tabang.

Gitigum ang mga giila nga opisyal sa kasamtangan nga Sustainable Livelihood Program (SLP) Associations ug SLP staff sa Davao de Oro, niadtong Septyembre 18, 2022, nga gipahigayon sa lungsod sa Nabunturan aron mahisgutan pa ang ubang mga angayang himuon aron nga mas molambo pa ang programa.

Ang pagbansay-bansay gitumong sa pag-edukar sa 17 ka SLPA officers gikan sa lain-laing lungsod sa Davao de Oro ug 12 ka SLP Project Development Officers sa pagrehistro sa non-stock corporations.

Gihisgutan usab ang ubang mga hisgutanan sama sa SEC reportorial nga mga kinahanglanon, pagsumite sa mga taho pinaagi sa Electronic Filing and Submission Tool (eFAST), ug Illegal Investment Schemes.

Kini nga inisyatibo resulta sa padayon nga pag-monitor ug ebalwasiyon sa mga kasamtangang SLPA sa rehiyon. Dugang pa, giapil usab ang mga kawani sa SLP sa probinsiya aron i-roll out ang nasangpit nga mga topiko sa ilang tagsa-tagsa ka lugar nga nadestinohan.

Tumong sa SLP nga mapauswag ang kaayohan sa ekonomiya sa mga huyang, marginalized, ug disadvantaged nga mga indibiduwal ug pamilya sa mga komunidad pinaagi sa pagpalihok ug paghatag og gahum sa mga susama, pinaagi sa suporta sa mga yunit sa lokal nga gobyerno ug uban pang ahensiya sa kagamhanan. (Uban sa taho sa DSWD-Davao)