PERSONAL nga bangi ang gilantaw nga motibo sa mga awtoridad sa pagpusil patay sa traysikel drayber sa iya mismong pasahero alas 4:05 p.m. niadtong Miyerkules sa Pikit, probinsiya sa Cotabato.

Giila ang biktima nga si Ustadz Daib Datukan, 46, minyo ug nagpuyo sa Barangay Galigayanen sa nahisgutang lungsod.

Matud ni Pikit Chief of Police, Major Maxim Peralta nga gipara ang traysikel nga gimaneho ni Datukan sa duha ka pasahero nga nag-atang sa may irrigation canal sa National Irrigation Administration (NIA) sa Sitio Lapreza, Barangay Ladtingan.

Apan imbis nga mosakay, gipusil na hinuon ang biktima gamit ang kalibre .45 nga pistola.

Daling misibat ang mga suspetsado sakay sa motorsiklo paingon sa hilit nga dapit sa Pikit.

Patay diha-diha ang biktima human maigo sa mga bala ang nagkadaiyang parte sa lawas niini.

Hinuon kapulisan sa Pikit Municipal Police Station padayon pang nagsusi sa hitabo aron nga matumbok ang tinuod nga hinungdan niini.